Na momento ku a detené Celestin ku te dia di awe ta para riba su inosensia.

Nieuwe Haven, — Ta e intenshon pa trata e kaso di e dos akusadonan Sigmar Celestin i Swendly Martina riba 28 di aprel próksimo den korte di apelashon.,

Den korte di promé instansha, ámbos akusado a keda kondená na 7 aña di prizon pa dos atrako ku nan a kometé den ménos ku un ora.

E kaso aki ta un kaso ku varios biaha a keda posponé pa motibu di covid, transporte òf kualke otro kos. Na varios okashon e dos detenidonan aki a keda prometé ku nan kaso lo keda tratá pero te ainda nada. Awor aki e speransa ta dia 28 di aprel próksimo.

Korte di promé instansha a haña ámbos akusado kulpabel di dos atrako. Riba 14 novèmber 2019 , e duo aki huntu ku un persona mas lo mester a kometé 2 diferente atrako kual un di nan tabata na Tera Kòrá miéntras e otro tabata na Marshall Planten den serkania di Tera Kòrá mes.

E hòmber Celestin kende a keda detené 14 novèmber mes den aria di Esperamos Supermarket, a indiká na varios okashon ku e no tin nada di aber ku niun atrako i ku el a kaba di kumpra un pan na Libanesa i ku na e momentu ei, e tabata kana bai pa e kumpra mariwana.

Martina den su deklarashon a trese dilanti ku e tabata warda un tal “Wewe di mondi” despues ku nan a bai mondi pa kue prikichi. Martina a bin keda detené pa polis na altura di e edifisio unda tabata Burger King na Janoorduynweg. El a bisa ku e no tin nada di aber ku atrako i ku ta pòrnada polisnan a deten’é.

Semper, ámbos akusado ta para riba nan inosensia. Ban wak kiko korte di apelashon lo pensa di esaki.