E kurpanan a keda hañá kologá na un kabuya.

QUITO – Outoridatnan polisial ekuatoriano a informá di hayasgo di dos kurpa sin bida kologá na un brùg di e provinsia di Orellana, situá na e zona amazóniko di e pais.

Outoridatnan a presisá ku e kurpa di e dos hòmbernan tabata kologá na un kabuya riba e brùg di Payamino.

E kurpanan tabata presentá supuesto señalnan di violensia.

Di su banda, Fiskalia a ordená e lantamentu di e kurpa nan topá na e brùg. Tur a keda transportá pa e Sentro Forense di Sucumbios, unda lo realisá outopsia.

Ecuador ta pasando den un subida di ola di inseguridat i violensia, prinsipalmente na man di gèng nan i mafia di narkotráfiko i krímen organisá.

Kaso di homisidio nan a subi den e último 5 añanan di 5.8 pa 25.62 pa kada 100.000 abitante. Ta trata aki di e sifra mas haltu for di tempu ku tin registro i eksperto nan ta atvertí ku e aña 2023 aki por kaba ku masoménos 40 pa kada 100.000. Esaki lo hasi Ecuador e pais mas violento den Latinoamérika.