E mamanan tabata prekupá pa nan yunan ku a bin Kòrsou ku lancha.

Willemstad,– Riba 21 di sèptèmber último un lancha a keda interseptá den oranan di mardugá. Segun informe, e lancha a originá for di Venezuela kaminda 7 hende hòmber, 7 hende muhé i 5 menor di edat tabata riba e lancha.

https://fb.watch/nyfsOVX-Io/?mibextid=2JQ9oc (klik pa wak video)

Despues di yegada di e lancha na kosta di Kòrsou, algun persona indokumentá ku ya tabata na Kòrsou a mèldu na Departamento di Imigrashon indikando ku nan ta mayor di e muchanan ku a yega riba lancha. E personanan akí a keda detené riba sospecho di trafikashon di hende. Mirando ku e okupantenan di e lancha ta indokumentá i tabata kompañá pa 5 menornan outoridatnan a habri un investigashon di trafikashon di hende.

Dos mama di Venezuela, ku yudansa di Human Right Defense Curacao, a entamá un wisio sumario kontra di Pais Kòrsou. E wisio sumario ta pa e mamanan por haña nan yunan bèk ku a bin Kòrsou riba e lancha riba e dia ariba menshoná. Ta asina ku basá riba leinan internashonal, mester tin diferente dokumentashon verifiká pa determiná ku enbèrdat e yunan ta yu dje mamanan. Pero ta asina ku un dje mamanan a indiká ku gobièrnu di Venezuela nunka lo no kolaborá ku dokumentashon di verifikashon. E diskushon a bai asina leu ku konsulado di Venezuela a indiká ku nan lo no yuda e mamanan debí ku e mamanan a bandoná Venezuela riba un forma ilegal i esaki ta wòrdu konsiderá komo bèrgwensa pa e pais.

Relashoná ku derechinan internashonal di mucha, un gobièrnu tin obligashon pa duna kuido adekuá na un mucha menor di edat, na momentu ku nan no tin mama ni tata. Den e kaso aki, 5 mucha menor di edat a originá for di Venezuela for di lancha i e mayornan ku a presentá na warda di polis no tabata tin sufisiente prueba ku nan ta e mayornan di bèrdat. Pues den un kaso asina, gobièrnu di Kòrsou tin obligashon pa duna e muchanan menor di edat e kuido meresí. Ta asina ku e mamanan a trata na duna outoridatnan akte di nasementu di e muchanan, pero e akte aki no tabata verifiká dor di entre otro un notario. Den e mundu di trafikashon di hende, sa tin falsifkashon di dokumentashon, pues den e kaso aki, no por ekskluí falsifikashon.

Abogadonan Chester Peterson i Andreina Faria a splika e punto di bista di gobièrnu enfatisando ku e mamanan no tabata tin dokumentashon verifiká, pues gobièrnu no por “djies” duna e mamanan e yunan.

Pa duna prueba ku e mamanan ta enbèrdat mama di e yunan ku a bini ku lancha, abogadonan ku a hiba defensa pa e mamanan a duna diferente potrèt indikando prueba di embaraso i potrètnan ku kaminda e mama ta huntu ku e yunan. Basá riba e informashon nan aki, hues a indiká ku tin sufisiente indikashon ku e mamanan den sala di korte bèrdat ta mama di e yunan ku tabata riba lancha riba 21 di sèptèmber último. Sinemargo, ámbos mama tabata dispuesto pa hasi tèst di DNA, pa asina nan por haña sufisiente prueba.

Tambe durante e wisio sumario, a bini dilanti ku e mamanan no tabata tin ningun kontakto ku nan yunan for di na momentu ku e yunan a yega Kòrsou riba 21 di sèptèmber último. Segun abogado Blonk, kende a hiba defensa pa e mamanan latino, ta via via nan a bin haña sa ku probablemente e yunan ta kedando den Huize St Jozef. Abogado Blonk a splika ku kada bes e informashon tabata kambia, un ora a bisa ku e yunan tabata na internat di brakapoti i otro ora a duna informashon ku e yunan ta na famianan privá. Despues a bin resultá ku e yunan lo ta na Huize Sint Jozef.

Vigilante no por a risibí ningun komentario di representantenan di gobièrnu, pero tin sufisiente indikashon ku e yunan mester a pasa henter un anochi den sèl di Rio Canario. Mas aleu, e mamanan a deklará na korte ku ora nan a bai buska nan yunan ku a yega Kòrsou ku lancha, nan a nota ku nan yunan tabata hole stinki pishi. Sinembargo, un dje mamanan a splika hues ku su yu a asta bis’é ku e tin hamber.

Butando tur e echonan riba un liña, korte den promé instante a duna su veredikto 1 ora despues di a sera e kaso. Ta asina ku e mamanan a risibí nan yunan bèk, kaminda den oranan di atardi e mamanan mesora a bai buska nan yunan na Sta Rosa.