Personal di Kolegio San Dominico, ku ta un di e skolnan ku a bira miembro di UNESCO su Ret di Skolnan Asosiá

PUNDA- Ayera Gobièrnu di Kòrsou a publiká ku dos skol mas na Kòrsou a bira skol di UNESCO. Skolnan di Fundeshi Kolegio San Dominico i Emmy Berthold trahando riba un futuro briyante, a bira miembro di UNESCO su Ret di Skolnan Asosiá.

Kolegio San Dominico i Skol Emmy Berthold a haña aprobashon di UNESCO pa forma parti di e ret internashonal di UNESCO-ASPnet. E dos skolnan aki ta pertenesé awor na un komunidat global di skol ku for di 1953 ta stimulá i krea mas oportunidat.

E aprobashon aki ta nifiká ku e skolnan awor por partisipá na interkambio i konsientisashon di balor den edukashon pa komprenshon internashonal i den inovashon. Ademas, nan por  partisipá den kampañanan global, selebrashon i kompetensianan konforme prioridatnan di UNESCO. Tambe, awor e skolnan por konektá, kolaborá òf fraternisá ku skolnan partner den mas ku 180 pais rònt mundu.

Kiko ta UNESCO su ret di skol

UNESCO Associated Schools Network (ASPnet) a originá na 1953, momentu ku UNESCO a lansa un proyekto ku yama ‘Plan Koordiná pa Aktividatnan Eksperimental den Edukashon pa Biba den un Komunidat Mundial’. Awendia, ASPnet ta representá un ret global di 11,700 instituto edukashonal den 182 pais ku ta ofresé edukashon pre-básiko, básiko, sekundario, tékniko i vokashonal òf entrenamentu pa bira maestro. Miembresia di ASPnet ta pòrnada pa tur miembro. No mester paga pa aplikashon, atmishon, sertifikashon òf renobashon di miembresia.

E dos skolnan a apliká na UNESCO i nan a haña aprobashon basá riba e aktividatnan ku nan ta desplegá. Ku afiliashon di Kolegio San Dominico i Emmy Bertholdschool, Kòrsou por ta orguyoso di tin awor kuater skol ku por yama nan mes Skol di UNESCO. E promé ta Skol di Fundeshi Kolegio Don Sarto na 2009 i e di dos na 2018 ku ta Skol di Fundeshi J.W.Th. Schotborgh. Otro luna riba dia internashonal di Toleransia e skolnan ta risibí nan sertifikado, durante un aktividat atardi riba Wilhelminaplein den kuadro di e dia akí.