Nieuwe Haven,– Dos diferente kaso lo keda tratá e luna aki kaminda tatanan tei trata na risibí mas derechi riba nan yu.

Ta asina ku luna pasá dos diferente tata den dos diferente kaso a risibí e derechi pa wak nan yunan ku mas regularidat. E promé kaso ku a keda tratá a wòrdu tratá riba dos diferente fecha kual tabata 3 di ougùstùs i 10 di ougùstùs. Den e kaso aki e tata ke a blòkia e mama di muda pa Hulanda ku e yu menor di edat.

E tata a entamá e kaso kontra di su èks pareha riba 1 di ougùstùs, pero e siguiente dia(2 di ougùstùs), e mama ya a move pa tera friu. E meta dje wisio sumario ta pa korte rekonosé e tata komo tata dje yu riba un forma hurídiko, pa asina e tata risibí derechi paternal riba e yu. Ta asina ku hues a dikta den fabor dje tata. Hues ta duna e tata derechi pa wak e yu tres biaha pa siman. Tambe hues a indiká ku grefi lo plania un proseder a fondo ku lo keda tratá no mas lat ku 5 di sèptèmber próksimo.

Otro kaso kaminda un otro tata tambe ta hiba su èks pareha dilanti pa asina risibí derechi paternal di e yu ta un kaso ku a keda tratá riba 16 di ougùstùs 2023. E tata a pidi korte pa entamá un proseso a fondo pa asina e tata risibí tur derechi paternal riba e yu.  E proseso a fondo ta pendiente tratamentu riba 19 di sèptèmber 2023. Mas aleu, e tata a pidi pa korte duna e tata tur obligashon pa kuido riba e yu. Pero mesora e mama a duna su opheshon kontra di e petishon dje tata.

Aktualmente ámbos tata a risibí derechi pa wak nan yunan ku basta regularidat. Den ámbos kaso abogado mr Eisden ta hibando defensa den e sala sivil.  

Abogado mr Marie-José Eisden kende a intermediá den e kasonan ariba menshoná a indiká na Vigilante ku e no por duna informashon den e kasonan aki komo ku ta trata di derechi familiar. Segun e abogado kende ta eksperto den derechi familiar a indiká ku e kaso aki a finalisá den fabor dje tata, pero tin algun kaso anterior ku no tabata dje positivo pa tatanan ku a risibí prohibishon pa wak yu.

Den e veredikto di e kaso ku a keda tratá riba 16 di ougùstùs 2023 korte a dikta ku e mama a mal usá e derechi paternal(ouderen gezag) ku e tin riba e yu. Segun e veredikto, e mama a aktua kontra di lei di e derechi paternal dor di kita e yu for di e tata sin traha ningun afsprak.  Apesar ku e mama a prohibí kontakto, e mama a indiká den sala di korte ku e no tin problema pa e tata drenta bèk den kontakto ku e yu.

Derechi paternal

Den lei lokal e mama ta risibí e derechi paternal riba e yu na momentu ku e yu nase. E tata lo risibí e derechi despues di pidi un petishon formal na korte òf si e tata i mama a drenta den matrimonio promé ku e yu a nase.

Segun e lei, e mayor ku tin e derechi paternal riba e yu tin e derechi pa kuida i kria e yu. Bou di e lei aki mester komprondé tantu kuido físiko komo kuido mental ta importante meskos ta konta ku e seguridat di e mucha menor di edat. Tambe e mayor ku e derechi paternal tin e derechi pa yuda den desaroyo mental dje yu.