Willemstad—–E yu di Kòrsou Katherine Filesia a promové komo doctor den “Notarieel Recht”, despues di a defendé su PhD tésis eksitósamente na universidat di Leiden djaweps 5 di òktober.

E tésis di dr. Filesia tin un interesante título ku ta: “Speaking the Same Language: De invoering van de Anglo-Amerikaanse trust in het Nederlandse recht”. Su investigashon ta trata di e figura ‘trust’ ku ta wordu usá internashonalmente den entre otro e mundu finansiero i kon pa implementá den e sistema hurídiko Hulandes. Durante di e proseso pa skirbi su tésis dr. Filesia a wordu guiá dor di prof. dr. Pim Huijgen y prof. dr. Frans Sonneveldt. Banda di e dos profesornan ariba menshoná, prof. dr. Willem Zwalve tambe a duna su sosten.

Ta bon pa menshoná ku dr. Filesia a usa e lei eksistente di Kòrsou, Landsverordening Trust, ku a drenta na vigor na aña 2012 komo base pa su investigashon. E lei aki tin su orígen pa gran parti den e sistema di lei Anglo-Amerikano. Esaki a indusí dr. Filesia pa bishitá e prestigioso Universidat di Oxford di e instituto yama “Insitute of European & Comparative Law”.  Prof. dr. Birke Haecker, prof. dr. William Swadling y prof. dr. Lionel Smith di e instituto ariba menshoná a supervisá  dr. Filesia su investigashon durante algun luna, di manera ku el a haña e konosementu nesesario di e trust. A base di entre otro e investigashon aki i konosementu ku el a atkirí, ela bin ku solushonnan konkreto pa repará e lei di Kòrsou ku ta trata e figura trust den kua el a deskubrí diferente desperfekto y alabes proponé e introdukshon di e trust den e legislashon Hulandes.  

Dr. Katherine Filesia su lombrishi ta derá na Kòrsou. Den su promé añanan el a bishitá Berg Carmel College, despues el a terminá su VWO na Maria Immaculata Lyceum, i a sigui su estudio na Universidat di Leiden. Aya el a optené un master den Rechtsgeleerdheid y den Notarieel Recht simultaniamente. Den pasado dr. Filesia a traha komo dosente Notarieel Recht na Universidat di Leiden i te ku awe ainda ta afiliá na e afdeling aki. Aktualmente e ta traha komo kandidaat-notaris Estate Planning & Corporate M&A na BarentsKrans na Den Haag.