WILLEMSTAD,—-Tabata djasabra tras di lomba den oranan di atardi ku e organisashon ’Boldstarz’, ku suma plaser a presentá e 12 partisipantenan pa loke ta trata festival di tumba hubenil 2024.

E presentashon a tuma lugá na e sitio ku ta hiba di nòmber ‘Tugboat Beach’, ku ta keda situá banda di Baya Beach. Ta asina ku kada partisipante a haña e honor pa presentá nan mes na e medionan di prensa ku tabata presente i esaki a kana den gran forma. Despues di esei algun sambuyadó a sali for di laman i nan a subi tera kaminda ku nan a trese e number nan pa kada partisipante por a skohe.

E sistema ku e organisashon a hinka den otro a kai den bon tera serka tur e persona nan ku tabata presente djasabra atardi na e sitio menshoná. Esaki ta e 12 nòmber nan i mesora pega ku nan number ku nan ta partisipá kuné dia 13 di yanüari binidero den Curaçao Festival Center.

“1. T’kayley Polonius, 2. Angelly Virginia, 3.Nedion Sluis, 4. Angely francisco, 5. Shadee Jamanika, 6.   Luichaiden Jansen, 7. Aaliyah Lourens, 8. Railipo Martina, 9. Tiarah Martina Giterson, 10.Jozefer Obispo, 11. Jean Max Rondei  i number 12 ta Xyandro Anthony”.

Pa otro aña tin un kambio i e kambio ta ku e 12 partisipante nan ta keda kompañá pa un solo agrupashon musikal i e agrupashon musikal ta keda dirigí pa e popular músiko pianista Nadienne Martina, e agrupashon musikal ku ta bai kompañá e 12 partisipante nan ta hiba di nòmber “Tumba Hubenil Orchestra”.