Sea Turtle Conservation Curaçao huntu ku Coast Guard i Citro a train pa asina prepará un prosedura di reskate.

Willemstad, — Ekspertonan ta bon prepará pa un prosedura di reskate dor di e kantidat grandi di alga ku a aparesé na kostanan di Kòrsou.

Ard Vreugdenhill di Sea Turtle Conservation Curaçao ta informá ku dor ku nos ta den kódigo kòrá nos ta bezig ta train pa reskate di nos turtuganan  pero tambe nos mes siguridat. Esaki debí ku diferente área di Kòrsou su kostanan a keda afektá ku Sargassum. E áreanan mas afektá pa Sargassum ta Ascencion i Sint Joris.  A simulá un aksidente den kual Ard Vreugdenhil mes a keda reskatá for di e awanan. Vreugdenhill ta bisa ku e situashon no ta malu manera kompará na 2020, ya komo alga na nos kostanan ta un problema ku nos ta haña kada aña. Pues pa tene e situashon bou di kontròl, Vreugdenhill ta bisa ku huntu ku Coast Guard i Citro a train pa asina prepará un prosedura di reskate.

E training ta enserá teoria i tambe práktika pa asina buska turtuga den awa pero tambe esaki ta pa nos propio siguridat, Vreugdenhil ta splika. Den e training grandi a baha for di klef pa check i tambe a tene kontakto ku radio i diferente pòst rondó di e boka. A limpia pa asina e trainers por yega tambe na e awanan. Tin hopi alga ta bin drenta e boka pero dor ku esaki ta bira kayente e ta deskomponé i esaki ta trese balansa. Vreugdenhil ta bisa ku e situashon ta hopi malu pero ku nos ta den kòntròl. Segun Vreugdenhil normalmente fin di mei kos lo bira mas normal pero esaki ta dependé di  tempu. E temperatura di e awa, temperatura general, koriente, bientu tur esakinan tin efekto riba e alga.

Vreugdenhil ta informá ku e training pa un prosedura di reskate tabata hopi i ku nos ta kla i prepará. A hasi e training ku un grupo grandi i kada dia bai ta bai Ascencion pa check e situashon. Kòrsou atrobe ta den e temporada ku kantidat grandi di Sargassum ta drif yega nos kosta. For di dos siman pasá Ministerio di GMN a risibí notifikashon kaba ku tin kantidat grandi di Sargassum den laman ta biniendo den nos direkshon. Sargassum ta un tipo di alga di Mar Atlántiko ku semper ta drif liber riba laman. Ounke hende ta eksperenshá molèster momentu ku e Sargassum ta riba tera, e tin un funshon importante den ekosystema marino. E ta forma refugio pa hopi sorto migratorio i ta habitat pa mas ku 120 sorto di piská i hopi sorto di espesie.

Pa sierto espesie den peliger di ekstenshon manera turtuga tambe Sargassum ta forma habitat, refugio i kuminda. Apesar di e funshon fundamental di Sargassum den ekologia mundial, unabes riba tera i den kantidat grandi e ta forma molèster pa hende den forma di holó stinki. Alabes, momentu ku Sargassum drenta un di e bokanan e ta yena esaki di tal manera ku e ta forma peliger pa entre otro turtuganan. Nan ta keda pegá den e Sargassum bou di awa i no por bini ariba pa hala rosea.