Jeannette Juliet-Pablo kende ta traha den diferente proyekto sosial na Kòrsou.

Willemstad,– Djabièrnè último FKP a entregá yabi di sentro komunitario di Sapaté. Despues di entrega di yabi Vigilante a logra hiba kòmbersashon ku Jeannette Juliet-Pablo kende ta aktivo den vários proyekto sosial na Kòrsou.

20 aña pasá ora tabata konstruí i plania e bario di Sapaté abata tin diferente plan riba mesa pa enfatisá e proseso sosial den e bario. Pa un rason òf otro lamentablemente e plan nan a frakturá kaminda vários plan nunka a wòrdu ehekutá. Un dje plan nan tabata un sentro komunitario den e bario, pero awor si e sentro a bira un realidat.

Segun Jeannette Juliet-Pablo, awor ku e sentro komunitario ta konstruí mester enbolbí habitantenan mas tantu den e proseso pa sigurá éksito. E komishon di bario lo aserká habitantenan pa sa kiko e nesesidatnan ta. Basá riba e informashon risibí, e komishon lo traha un programa di operashon pa asina sigurá ku e sentro lo wòrdu usá.

Den pasado sentronan di bario tabata wòrdu konstruí ku meta pa duna un servisio na e bario. Dado momentu por nota ku e servisionan no tabata wòrdu usá dor di e bario lagando e sentro semi-bandoná. Solamente habitantenan di otro bario tabata utilisá e sentro di bario.

Tambe Juliet-Pablo a splika tokante otro plan nan pendiente ehekushon den e bario di Sapaté. Den futuro lo bai limpia e roinan den e bario ku meta pa laga hende rekreá aden. E roinan den Sapaté ta hopi grandi kual tin sufisiente área pa hende por kana aden. Tambe tin vários klùp di servisio ku ta presente den Sapaté ku proyektonan sosial i alabes ku meta pa eduká habitantenan di e bario riba un forma korekto.