Defensa: defensa di Glenn F, mr Baly na man drechi i mr Montroos na man robes. Baly a hiba un defensa amplio pa Glenn.

Sta Maria—Empleadonan di e kompania Beautilicious riba 12 di mei último, no a tuma aden serka un hòmber Glenn Saturnino F, kende a drenta nan negoshi i bai ku 3m oloshi marka Milano.

Ayera, Glenn F, a presentá dilanti wes pa responsabilisá su aktonan riba 12 di Mei. Tabata un drama kompleto. Glenn F. a atmití ayera dilanti hues mr Sigmar Carmelia di a kue e tres oloshinan pero desmentí di a saka kuchú riba unu di e empleadonan, Juni M. Tin diferente deklarashon riba e dia di suseso. Juni M, a deklará di a sali kore tras di Glenn pero na altura di Pizza Hut Sta. Maria, Glenn a saka un kuchú for bou di su flanèl i menasa Juni kuné. Na e  momentonan ei, Glenn a kore bai ku e tres oloshinan Milano ku e la yega hòrta bou di menasa for di e tienda Beautilicious.

Segun Juni M, na dado momento Glenn a zuai e kuchú den su direkshon i bis’é, “si bo sigui bin mi tras mi ta hinka no”. Un otro testigu di fam O., tambe a deklará di mira Glenn saka kuchú i meskos ta e deklarashon di Estefany G., kende tambe a deklará di mira Glenn saka kuchú. Pero e robo di Glenn no a resultá bon. Polis a logra detené Glenn riba mesun dia. Den un saku ku e tabata kana kuné a bion deskubrí e tres oloshinan Milano i tambe konfiská un kuchú riba dje.

Ayera durante tratamentu, hues mr. Carmelia a pasa den e situashon personal di Glenn. Glenn ta un rasta ku ta huma mariwana for di su 11 aña. E la deklará ayera di kometé e robo pasobra e no tabatin sèn. Pero e kosnan  kambia den su bida e la deklará na hues ayera pasobra hues a nota Glenn ku yen kadena di plata i un bunita oloshi. Carmelia” kos a drecha pabo, bo tin un bunita oloshi i yena kadena”. Segun Glenn e ta trahando e dianan aki i ta pasa kue sushi na restorantnan chines.

Fiskal mr Polderman a hasi un demanda di 120 ora di trabou boluntario sino 55 dia enkarselashon pa Glenn. E akusado alabes mester tene kontakto ku FMA Reklasering. E fiskal a tene kuenta ku e kaso mester a bai dilanti for di Sèptèmber último, pero debí na fayo den fecha di dagfar a trata e kaso mas lat. Esei tambe e la tene komo konsiderashon. Hues mr. Carmelia a bai di akuerdo ku e fiskal i splika ku Glenn tin un tempu di prueba di 3 aña aserka.