ASSEN—E eks-enfermero di hospital Wilhelmina ta ninga tur akusashon di a mata vario pashènt den temporada di pandemia.

Esaki segun su abogadonan. E abogadonan ta bisa den un deklarashon ku nan kliente a kopera ku e investigashon i duna deklarashonnan amplio na polis. Kliente a ninga for di komienso ku e ta kulpabel di aktonan kastigabel i sigur krimen. E vershon di hospital/GGZ ta keda refutá pa nos kliente segun abogadonan Knegt i der Goot. E hòmber a traha di 2020 pa 2022 riba e departamento di corona di e hospital. El a deklara na e personal di GGZ ku komo enfermero di pulmon el a termina bida di alrededor di 20 pashènt. E organisashon di kuido a tuma desishon di viola e obligashon di sekresia i tuma kontakto ku e hospital. E hòmber (31) tabata enkarselá for di medio aprel, pero a keda liberá ayera. Korte a determiná ku e sospecho no ta sufisiente fuerte pa tene sera mas largu. OM ta mira e enfermero ainda komo sospechoso i ta konsiderá apelashon. E investigashon riba e kasonan mortal na e hospital na Assen ta kontinua. Abogado Diekstra ku ta representá varios famia di posibel viktimanan a bisa RV Drenthe ku e liberashon di e homber ta hasi henter e kaso mas kompleho pa e famianan. Famianan ta spera ku ta bini klaridat pronto, pasobra e kaso ta duna nan hopi tenshon, segun Diekstra.