Enkuentro Barber.

Willemstad – E promé siudadano ku tin informashon adishonal pa e Komishon enkuesta HNO, a mèldu na e sekretariat di e komishon. Esaki a sosodé durante un di e dos enkuentronan ku e komishon a organisá djasabra último. Esaki ta mustra e balor pa konsultá ku pueblo. Skucha, kontestá pregunta i informá tokante e proseso di enkuesta tabata e intenshon pa organisá e enkuentronan ku públiko.

Asin’ei e komishon ta enbolbí komunidat den e enkuesta. Ta na e momentunan akí por topa siudadanonan ku di un òf otro manera ta sinti nan mes perhudiká. Durante e enkuentronan na Barber i Montaña, e miembronan di e komishon a aklará kon e preparashon a kana delaster añ’i mei. Presidente di e komishon Eduard Braam, a bolbe infatisá ku e enkuesta no ta un tribunal. “ Nos ke pa e hechonan ta konosí.” Parlamentario Eduard Braam durante e enkuentronan a haña sosten di e miembronan Giselle McWilliam, Ana-Maria Pauletta i Gwendell Mercelina. E otro dos miembronan di e komishon, Rennox Calmes i Michelangelo Martines, lastimá no por tabata tei. E públiko presente tabata hopi krítiko tokante e enkuesta. Asin’ei tabata ke klaridat riba e presupuesto di e komishon, a puntra si ta habrí pa duna tur informashon i tokante e proseso di trabou di e komishon. E miembronan di e komishon ta determiná pa enkuesta kana transparente. P’esei kada unu a tuma tempu pa kontestá e preguntanan di públiko. Mustrando asin’ei e union ku tin den e komishon di parlamento di Kòrsou. E aplouso ku e komishon a haña na final di e enkuentronan ta demonstrá ku a apresiá e manera habrí ku e Komishon enkuesta HNO a komuniká. A asta puntra ki dia e siguiente enkuentro ta. Te ainda por duna opinion tokante e trabou di e komishon. Pa esaki tin un enkuesta públiko. Por partisipá anónimo pero ta duna oportunidat na kada siudadano pa bini dilanti si nan tin informashon adishonal pa e Komishon enkuesta HNO.