Imposibel: un enkuesta parlamentario ta kasi imposibel.

Punda— Un enkuesta riba hospital nobo ta bira difísil sin dokumentashon. Esaki ta lokual a bini dilanti durante diferente tratamentu den kasonan sivil riba konfliktonan relashoná ku konstrukshon i maneho di CMC.

Den korte sivil a bin konkluí hinter e proyekto di HNO ta falta dokumentashon importante pa realmente investigá. E fayo mas grandi tabata den man di e gobièrnunan di 2013, 2014, 2015, 2016 i 2017. Durante ningun di e aña korespondiente, SONA no a entrega su kuentanan anual pero gobièrnu di Kòrsou a sigui paga SONA durante e periodo ku SONA tabata guia i manehá e proyekto di HNO. Na yüli 2019 den un kaso sivil, SONA a tilda Berenschot den korte di a apstené informashon i hinter e mapa di e proyekto di HNO. Esaki por laga konkluí ku na promé lugá gobièrnu di Kòrsou tabata paga SONA sin eksihí informashon miéntras SONA tabata paga Berenschot sin ku Berenschot tabata duna informashon riba kiko nan mester a wòrdu pagá. Tin indikashon ku e periodonan entre 2013 pa 2016 tin hopi kuestionabilidat.

E kostonan di konstrukshon HNO ta asina haltu ku mester di un nivel di okupashon na 92% pa por “break even” pero esei no ta tumando lugá ainda. Esaki ta trese e diskushon bek kon a sigui ku e Enkuesta Parlamentario. Entretantu a anunsiá un Komishon (atrobe) enkargá ku e proseso pa yena un enkuesta. Pero parlamento den su totalidat no ta tumando e Enkuesta na serio. Ta for di Òktober 2019 Parlamento a aprobá pa e Enkuesta bini, pero te ainda no tin nada definitivo i no ta trahando riba e struktura di e Enkuesta. E komishonnan den pasado no a hasi. Lokual hopi miembro di parlamento no ta komprondé ta dokumentashon importante den konstrukshon di HNO/CMC a pèrdè. I ta importante pa parlamento di Kòrsou mobilisá lihé pa investigá. Ta trata di dokumentashonnan e.o. importante pa averiguá kon i kuantu kambio di lokalidat a kosta i tambe presupuesto riba konstrukshon di un garashi pa stashoná outo.

Despues ku riba 7 di yüni 2013, kabinete Ajses a drenta Fòrti, riba 27 di yüni 2013 e tim di Ballast Nedam Infra i USONA a wòrdu invitá pa bini Hunta di Minister. Durante e reunion aki a kuminsá diskutí e posibilidat di kambio den lokalidat di hospital. E senario nobo mester a bira Otrobanda en

bes di tereno na Amstel. Hunta di Minister a eksihí pa Ballast Nedam, rekalkulá i hasi un estudio pa e lokashon nobo di Colon. USONA tambe a bai di akuerdo pa huntu ku VVRP, studia e posibilidat di un lokalidat nobo den área di Otrobanda. 3 siman despues, riba 17 di yüli 2013, Ballast Nedam ta entrega  USONA resultado di su estudio. Ta trata di kambionan drástiko den volúmen di e konstrukshon i inkomparabel ku e akuerdonandi konstrukshon inisial. Dokumentashon riba e proseso di desishon abase di e estudio di Ballast Nedam a disparsé i no ta optenibel.

Konsekuentemente Hunta di Minister a kuminsá mobilisá pa kambia destinashon di e hospital pa Otrobanda, pero tabatin problema ku lugá di stashoná outo. Konsekuentemente, riba 6 i 25 sèptèmber, Ballast Nedam Infra a traha un presupuesto inisial pa e stashonamentu di vehíkulo. E presupuesto di 25 di sèptèmber tampoko no ta optenibel, anke ku gobièrnu di Kòrsou a outorisá

ekspertonan pa bai buska i relatá nan. Riba 6 desèmber 2013  tambe Ballast a laga traha un prekalkulo di e konstrukshon ku nunka mas no a paresé. I na 19 desèmber, 13 dia despues a tene e “groundbreaking” ofishal di HNO na Otrobanda.  CMC a resultá te awe den un problema finansiero di 640 mion florin.