Hushang Ansary, a proponé dos kompania kandidato.

Punda— Te ku siman pasá, Ennia, Banko Sentral i grupo di Hushang Ansary no ta logrando pa yega na un balotadó (taxateur) pa Mullet Bay. Korte a ordená e partidonan pa buska un kompania renombrá mundialmente pa presentá un balor di Mullet Bay 5 di desèmber próksimo.

No ta promé biaha e dos partidonan no ta yega na un akuerdo pafó di korte. Segun direktor general di Banko Sentral, Jose Jardim, e proposishonnan di Hushang Ansary no ta serio. Na diferente okashon un deliberashon na mesa no a yega na un solushon.

Ansary tambe a yega di manda un karta pa Banko Sentral, ku no a keda kondisera komo un intenshon serio. Segun Hushnag Ansary, e karta tabata mará na kondishonnan. Esei ta lokual e propietario di Ennia Caribe Holding a duna di konosé na Vigilante.  Segun Ansary, no ta su persona tabata responsabel pa e problema den solbabilidat na Ennia. Riba  e karta pa yega na un areglo el a duna di konosé ku ta trata di un karta di bon intenshon pero “mará na kondishon”.

Hushang Ansary, mediante su abogado Mirto Murray yega di manda un karta pa Banko Sentral, dirigí na direktor Jose Jardim i Elisabeth Grimm, mènedjer Sekshon di Resolushon. Den e karta, Murray ta proponé pa yega na un final den e debakel di Ennia i trata na evitá prosedimentunan den korte sivil. Den e karta di Murray, e abogado a proponé un pago konforme e último desishon den korte sivil, pa lokual ta trata e pagonan totalisa na 1.1 miar florin. Ta trata di kasi 560 mion dòler estado unidense. Murray a skibi su proposishon na nòmber di PIBV, Parman International BV i ta representá tur akusadonan den e proseso sivil. Banko Sentral i tampoko Korte no a konsidera e proposishon unnu serio.

Awor e debakel entre e partidonan ta pa haña un kompania balotá balor di Mullet Bay. Te ku siman pasá e kompanianan no ta saliendo for di e problema. Informenan no konfirmá ta señalá ku Ansary lo a propone dos kompania kual Ennia ainda no a duna nan reakshon riba dje.