Eric K. e úniko hòmber den Reino hulandes ku sa dikon a mata Wiels.

Punda—En bèrdat ainda, tin diferente pregunta a keda kologá den kaso di asesinato Helmin Wiels. Unu di nan ta e motibu dikon Ministerio Públiko a tene pa hopi aña sekreto, kòmbersashonnan ku Wiels a hiba ku RST (lesa inteligensia ulandes).

E file di Maximus ku ta regardá e dos kondenadónan di Burney Nini Fonseca i George Jorge Jamaloodin den kombinashon ta surpasá mas ku 40 mil página di dokumentashon. Den e 40 mil página, tin prosès ferbal di testigunan, di funshonarionan di polis, reportero, ekspertonan forensiko, agentenan di inteligensia, funshonarionan di RST, rapòrt di investigadónan profeshonal i sientífiko. Pero niun kaminda no tin un prosès ferbal riba e kòmbersashonnan ku Wiels a hiba serka RST òf serka Eric K., eks teamchef di RST na Kòrsou. Esaki ta konkluí ku e kòmbersashonnan di Wiels i Eric K., tabata un sekreto skondí pa Ministerio Públiko te na momento Gert Rip, despues di 6 aña a bin atmití den korte ku K. i Wiels tabatin interkambio. Pero nunka, Rip no a divulgá kontenido di e interkambionan. De fakto, Gert Rip a hasi su máksimo pa tene e kòmbersashonnan un sekreto i hasta entre 20 pa 20 di mei 2013 a duna e hóben fiskal e tempu, mr. Guilliano Schoop, desmentí ku RST /Eric K. tabatin kontakto ku Helmin Wiels.

Eric K. tabata bayendo Ulanda pasobra su tèrmino di servisio a finalisá na Kòrsou. E tabata “team chef” interino na RST i sigur e klave prinsipal den investigashonnan rondó di asesinato Wiels. Apénas algun siman despues di su último kòmbersashonnan ku Wiels, Elvis Kuwas a “kaba su lachi” riba Wiels na Marie Pampoen. E konosementunan di Eric K., a pone RST mesora riba pista di Luigi Pretu Florentina i Elvis “Monster” Kuwas, simplemente pasobra Helmin Wiels a papia kuné kaba, riba nan envolvimentunan ku e.o. NLS, robo di bara di oro i dos atrako di oloshi ku botinnan mionario. Tabata via di Eric K., ku hustisia a kuminsá tap i opservá dos dia despues, bario di Koraal Specht i tambe telefonnan di e grupo ku tabata hunga dominó dilanti kas di Pretu Florentina riba e atardi di 5 Mei 2013. Wiels i Eric K. a papia tur kos kaba promé ku su morto.

Pero K., no tabata kier a bai bek i tabata as riba un posishon pafó di e kuerpo di RST. Durante mesun temporada ku K. tabata bayendo e la papia ku Helmin Wiels. Eric K i Helmin Wiels a papia riba un posishon nobo p’e den hustisia na Kòrsou. Esaki ta lokual Helmin Wiels a bisa Kade Wilsoe.  E dos hòmbernan a papia na inisio di 2013, mas spesífiko K. i Wiels a papia na diferente okashon entre febrüari 2013 pa mei 2013. Durante mesun periodo ku K. i Wiels a hiba nan kòmbersashonnan, tabatin un guera polítiko fuerte entre MFK i Pueblo Soberano. Wiels a tene e kòmbersashonnan ku K. den sekretu, pasobra su bodyguard apuntá pa Gobièrnu, Karel “Gachi” Josepha no tabata na altura di e kòmbersashonnan. Ni tampoko su konkubina, Betty da Fonte. Den seno di Pueblo Soberano tabatin algun persona na altura di e kòmbersashonnan.  Den seno di famia tambe. Werner Wiels a deklará na polis den un prosès ferbal ku Wiels a papia ku RST.

Promé ku Wiels tabata papiando ku RST i Eric K, tabatin robonan di oloshi hòrtá i bara di oro tabata tumando lugá na Kòrsou i na Aruba. E robonan di oloshi a tuma lugá na Yanüari i Yüni 2012 miéntras e robo di oro den haf di Kòrsou na Novèmber 2012. Den sirkulo di baho mundu, tabatin rumor ku e atrakadónan tabata bende e oloshinan ku eksponentenan di MFK.  E sospecho ta wòrdu fortalesé tambe dor di tres fuente, segun Ministerio Públiko. Via di e robonan di oloshi, Ministerio Públiko a kuminsá krea un vishon di tùnel pa pèrsigui Jorge Jamaloodin.  Segun Fiskal di Ministerio Públiko, Gert Rip, (den korte na Yüni 2019) Jorge Jamaloodin mester tabata kumpra oloshi hòrtá serka Pretu Florentina, pasobra na yüni 2012, Florentina tabata den outo momento a ofresé e oloshinan hòrtá na Jorge Jamaloodin. Esaki a tuma lugá segun Rip riba 2 di yüni 2012. Pero Rip, en realidat nunka a presentá pruebanan ku Jorge Jamaloodin a paga pa asesiná Wiels. Nini Fonseca tampoko a bisa esei i mas serio ainda, Elvis Kuwas a bisa ku e no sa nada ni konosé Jorge Jamaloodin. Lokual Gert Rip tabatin ta informashon for di e kòmbersashonnan entre Eric K i Helmin Wiels i abase di esei, inteligensia hulandes i Ministerio Públiko na Kòrsou a start un vishon, sin nunka a puntra si tabata Pretu Florentina riba su mes a plania tur kos. Ekvis Kuwas a deklará na diferente okashon mesun kos 1. Florentina a duna tarea. 2. Nini Fonseca a paga.

Mester tene kuenta ku un “side note” importante. Riba 3 di mei 2013 pa ta eksakto 11.48 am, Helmin Wiels ta risibí un sms ku ta bisa: ”awor si bo ta bai h……, Jardim ta daña tur kos p’abo, bo no ta bon”. Tres dia promé ku e sms aki, Luigi Pretu Florentina tabata na St. Maarten den un grupo di amigu disfrutando di karnaval. Direpiente, Florentina despues di a papia na telefon ta bisa su grupo di amigu “mi tin di bai Kòrsou pa kaba un trabou.

Pero, momento Luigi Pretu Florentina a yega for di St. Maarten, ya Helmin Wiels i Eric. a hiba diferente kombersashon i ya nan a traha un dil ku K. tei traha pa Nelson Navarro komo konsehero di minister. Ta promé biaha den historia di Kòrsou, ku un eks RST’er ta bira konsehero di minister. 7 di yüni 2013, Nelson Navarro a huramenta komo minister den kabinete Asjes i algun siman despues, Eric K. a stashoná su BMW blanku nobo den Punda i kana bai direkshon ofisina di Navarro. Helmin Wiels a regla e posishon pa K. promé di a fayesé i laga Kade Wilsoe afó komo minister di hustisia. Un zèt ku te awe, niun hende den Pueblo Soberano no por komprondé. Esei ta algu ku semper lo keda entre Eric K. i defuntu Helmin Wiels.