E malesa ‘Stony Coral Tissue Loss Disease’ por avansá rápidamente, kousando daño signifikante i mortalidat den e poblashon di koral.

Willemstad, — E estado di sierto koralnan den área entre Blauwbaai i Pietermaai a empeorá. Den área di Aqualectra Mundu Nobo/Koredor e malesa di koral a bira mas pió. E malesa Stony Coral Tissue Loss Disease a afektá diferente parti di mundu i awor ta na Kòrsou tambe.

Mark Verweij, e direktor sientifiko di Carmabi , ta menshoná ku desde un luna pasá e estado di e koralnan den área entre Blauwbaai i Pietermaai a empeorá. Segun Verweij e situashon tokante  e malesa di e koralnan ta alarmante. Sr. Verweij a menshoná ku  Stony Coral Tissue Loss Disease (SCTLD) a kuminsá den área di Aqualectra Mundu Nobo i Koredor i ku na e lokashon aki, e estado di e koralnan ta pió. Sr Verweij a menshoná ku tin alrededor di 10 sorto di koral aki na Kòrsou ku ta vulnerabel pa e malesa di SCTLD. Sr. Verweij a menshoná ku no ta tur koral ta dil ku e malesa di SCTLD na e mesun manera. Komo ehèmpel a menshoná e malesa di covid-19 i efekto ke tabatin riba nos. Verweij ta menshoná ku no ta tur hende ta mesun resistente na e malesa i esaki ta konta tambe pa e poblashon di koral bou di laman. 

Den e kaso di e koralnan, tin sierto koral ku ta bira malu i tin ku nò, tambe tin sierto koral ku ta kura mas lihé ku e remedi i tin koral ku no ta kura mesun lihé. Verweij a menshoná ku e reto ta kon e koralnan, ta reakshoná riba e remedinan eksistente. Aktualmente, ministerio di GMN a krea un plan di akshon basá riba informashon suministrá pa CARMABI. Esaki ta despues ku un tim di eksperto internashonal riba tereno di koral,a señalá pa promé biaha e SCTLD aki na Kòrsou, den luna di aprel último. Komo solushon gobièrnu a bestèl e ingredientenan nesesario pa produkshon di e antibiótika aki na Kòrsou mes pa kombatí SCTLD.

Den luna di sèptèmber último, sambuyadónan operashonal a risibí e remedi aki, pa asina apliká esaki riba e koralnan pa kombatí e malesa di SCTLD. Sambuyadonan operashonal mester spùit e remedi aki  riba e partinan afektá di e koralnan. Sinmebargo, Verweij a menshoná ku e remedi aki lo yuda pa kombatí e malesa di SCTLD bou di e koralnan ku ta vulnerabel pa e malesa. 

Sr. Verweij a kontinuá i a splika ku e proseso pa reskatá e koralnan ta bai tuma tempu. Mester warda i laga tempu pasa pa asina duna e koralnan e chèns pa kura.  Segun sr. Verweij tin un investigashon andando na Florida den kual ta hasi uzo di materialnan ku ta difísil pa haña dor ku esakinan ta hopi karu. Sr. Verweij ta menshoná ku lo keda pendiente riba e resultado di e investigashonnan ku ta andando na Florida i tambe na Kòrsou.