ORANJESTAD,—-E talentoso músiko, kantante, kompositor i alabes areglista boneriano Dwight Leoneta, kende ya pa un tempu ta biba na Aruba, a ekspresá algu ku sigur lo bai bira tópiko di kombersashon.

Ta asina ku e fundadó di agrupashon musikal Cache i tambe Buleria a duna di konosé ku “Esun ku ta hasi musikal ku sèn den su kabes, no ta logra nunka”. No ta un sekreto ku sigur den e último dékada aki, no tur, pero hopi músiko ta pone sèn dilanti di nan talento i esaki ta pone ku e amor pa hasi músika mes, no tin su forsa mas manera ku esaki tabata.

Dwight a duna di konosé ku bèrdat mester di sèn pa biba si, pero esaki no ta nifiká ku e músiko ta kue e faktor sèn pone dilanti di su talento. “Para ketu bo wak bon, rònt mundu e deportista mas eksitoso a sali for di pobresa. E músiko i/òf kantante eksitoso mayoria di nan a sali for di un famia ku a lucha duru pa kria i mantené nan famia. Esei a trese éksito den edukashon di nan yunan ku awe ta ehèmpelnan grandi pa mundu”.

Ta asina ku Vigilante Farándula a haña di komprendé ku ántes músiko i kantantenan na Kòrsou tabata hasi músika ku hopi amor i esaki a pone ku den pasado tabatin músikonan ku a yega hopi leu den mundu di farándula. Esaki ta konta pa artistanan di tantu Kòrsou, Aruba i Boneiru.

Pero loke ku ta pasando aktualmente kaminda ku for di e promé kombersashon ya e músiko i /òf kantante ta puntra kuantu ta paga. Ta asina ku Dwight a bisa ku “Esun ku ta hasi músika ku sèn den su kabes, no ta logra nunka”.