Willemstad—-Den ora nan di mèrdia di djaluna 22 di aprel, Sentro Marítimo Operashonal di Wardakosta (MOC) a risibí un mensahe for di un boto na Klein Kòrsou, indikando ku un pasahero hende muhé turista di 56 aña di edat, a kai i lastimá su kurpa a bordo di e boto.

 E la herida su kabes i brasa.  E kapitan di e boto a informá ku e persona ku a lastimá su mes, a duna di konosé, ku e por warda te ora e yega bek na Kòrsou, pa asina risibí atenshon médiko. Personal di MOC tòg a disidí di komuniká ku e dòkter di CITRO pa splika e situashon i asina tende su opinion.  E dòkter di CITRO a kontaktá e boto i despues di a analisá e situashon, e la sugerí pa buska e persona pa risibí tratamentu médiko na Kòrsou. Mes ora a manda e helikòpter di Wardakosta den direkshon di Klein Kòrsou pa asina transportá i hiba e señora HATO. Personal di ambulans tabata presente pa transportá e persona pa e por risibí tratamentu médiko na CMC.