WILLEMSTAD – E organisashon Konseho pa Mantenshon di Lei (Raad voor de Rechtshandhaving, RvdR) resientemente a saka un rapòrt ku resultadonan dje investigashon pa determiná na ki medida instansianan di investigashon ta organisá, pa finalisá kasonan penal den un término stipulá, pa asina evitá mas tantu posibel ku ta surpasá e término legal stipulá den tratadonan, hurisprudensia, i lei. Segun RvdR, falta di personal i material ta keda forma opstákulo pa realisashon di investigashonnan penal.

E meta final di e investigashon di RvdR, ta pa mehorá e derecho di personanan ta bin den kontakto ku hustisia, konforme artíkulo 6 insiso 1 di e Tratado di Derechonan Humano (EVRM), i pa reforsá e funshonamentu di e kadena di investigashon. Na final di dia, mas tantu prolongá un investigashon i persekushon penal, mas grandi e rísiko lo ta ku durante tratamentu dje kaso den Korte di Promé Instansia, lo surpasá e término legal.

Kuadro legal

Segun e rapòrt, leinan nashonal ta kontené diferente regla ku ta indiká ku mester finalisá kasonan penal den un término rasonabel. Areglo di Estado di Kòrsou (artíkulo 17 iniso 3) ta stipulá ku e proseso kontra un persona di kua a kita su libertat, mester tuma lugá den un término rasonabel. Kódigo di Prosedimentu Penal di Kòrsou (WvSv) ta kontené diferente términonan ku Ministerio Públiko (OM) mester tene su mes striktamente na dje, den kaso ku ta limitá un persona di su libertat. Segun RvdR, esaki ta promové ku mester finalisá kasonan penal den un término rasonabel di dos aña, manera stipulá den hurisprudensia.

Maneho

E investigashon a saka afó tambe ku OM, Kuerpo Polisial di Kòrsou (KPC), Landsrecherche di Kòrsou (LrC), ni Recherche Samenwerkingsteam (RST) no tin un maneho ku ta inkluí términonan stipulá pa e durashon di kasonan penal. Den pasado, OM tabata maneha términonan stipulá pa kada kategoria di delito determiná, kaminda e fiskal mester tuma un desishon ku ta traha riba e kaso òf nò, despues ku a registrá e kaso na Parket. Segun RvdR, un maneho stipulá ta promové seguridat hudisial pa personanan i transparensia den instansianan di investigashon.

Dirigimentu

Segun RvdR, a establesé diferente grupo di dirigimentu den kadena hudisial, pa guia investigashonnan. Nan ta guia e investigashonnan na nivel stratégiko, táktiko i operashonal. Ta prioritisá i monitoriá kasonan penal den e gruponan di dirigimentu akí. Segun RvdR, esaki ta positivo pasó ta stimulá instansianan di investigashon pa finalisá investigashonnan penal sin tardansa innesesario.

Personal

For di e investigashon di RvdR ta resultá ku kapasidat di personal ta un reto pa instansianan di investigashon (OM, RST, LrC i KPC). KPC ta risibí sosten for di RST i Marechaussee di Reino (KMar). OM i RST mester spar riba nan finansa. Esaki tin impakto riba kapasidat di e organisashonnan. E instansianan di investigashon ta uza kreatividat pa logra nan meta. Nan ta traha tambe riba diferente trayekto pa mantené konosementu di nan personal aktualisá. Segun RvdR, e instansianan di investigashon akí, mester disponé di kapasidat di personal propio konforme nan plan di organisashon.

Rekursonan

KPC i LrC ta konfrontá falta di rekursonan modèrno pa hasi investigashonnan. E falta di e rekursonan akí por hasi ku investigashonnan ta tuma mas tempu di loke mester. Den praktiká ta mitigá e riesgo akí, pasó e instansianan di investigashon ta risibí sosten for di RST i KMar ku sí tin e rekursonan akí. RvdR ta di opinion ku e instansianan di investigashon mester ta disponé di manera struktural di rekursonan adekuá.

Resultadonan

E instansianan di investigashon den kadena hudisial no tin registrashon spesífiko di e durashon di investigashonnan tampoko. RvdR ta di opinion ku nan ta hasi bon di registrá e tempu ku ta tuma pa finalisá kasonan penal. Pero RvdR ta konsiderá ku e falta di datonan tokante e durashon di kasonan penal den kadena hudisial ta un pèrdida.

Rekomendashonnan

RvdR a hasi algun rekomendashon na Minister di Hustisia, pa loke ta trata OM, KPC, LrC i RST. “Mantené un registro di e tempu ku ta tuma pa kasonan penal, inkluyendo e fecha ku a kuminsá e investigashon te na e momentu ku a tuma un desishon riba e kaso. Ministerio Públiko mester establesé un maneho pa términonan di durashon di investigashonnan penal (norma di kadena), den konsulta ku e instansianan di investigashon. Landsrecherche tin ku sòru pa yena e vakaturanan, spesífikamente pa e puesto di investigadónan finansiero, investigadónan digital, analistanan i tambe personal pa traha dosier. I tin ku sòru pa LrC i KPC por disponé di nan propio rekursonan.”