WILLEMSTAD – Konseho di Konsulta Kòrsou (Raad van Advies, RvA) a publiká un análisis profundo di e konsepto di lei pa kambia Kódigo Penal. E meta dje kambio di lei ta pa subi kastigunan pa ladronisia di animal, vehíkulo i ladronisia di turista. Vigilante por konkluí for di e konseho ku no por introdusí e lei akí manera a present’é.

Den e notanan sustantivo, Konseho di Konsulta ta enfatisá e nesesidat pa definí e término ‘turista ku ta presente pa propósitonan rekreativo den pais’ mas detayadamente i evitá posibel diskriminashon. Den general e kambionan proponé ta relashoná ku tres sirkunstansia ku ta oumentá kastigunan den artíkulo 2:289 dje Kódigo Penal. Nan ta inkluí ladronisia di turista pa propósitonan rekreativo, ladronisia di bestia for di kunuku i ladronisia di vehíkulonan motorisá.

Konseho di Konsulta ta enfatisá e importansia di investigashon serio tokante e nesesidat di intervenshon di gobièrnu i tambe si esaki ta útil, promé ku establesé reglanan nobo. Segun e konseho, no tabatin sufisiente investigashon di sifra i análisis finansiero pa hustifiká e nesesidat dje kambionan proponé.

Efektividat
E oumentonan di kastigu propoponé posiblemente por hustifiká un demanda di kastigu mas altu di Ministerio Públiko. Sinembargo, Konseho di Konsulta a nota ku e medida final di kastigu dje huesnan ta dependé di diferente faktor, i no tin garantia ku nan lo imponé kastigunan mas altu tòg.

Ademas RvA ta enfatisá e falta di konkordansia ku leinan den otro parti di Reino, spesialmente tokante e distinshon entre turista. E Konseho di Konsulta ta enfatisá den su rapòrt di konseho, ku tin e nesesidat pa defini e término ‘turista ku ta presente pa propósitonan rekreativo den e pais’ mas detayadamente i evitá posibel diskriminashon. RvA ta konsehá pa buska konseho serka Korte Komun di Hustisia i tambe Ministerio Públiko, spesialmente tokante e efektividat dje proyekto di lei i ehekushon di esaki.

Plaka
Konseho di Konsulta a nota ademas un falta di base finansiero den e nota di splikashon (“memorie van toelichting”), enfatisando e importansia di inkluí e konsekuenshanan finansiero dje proyekto di lei akí. RvA a konsehá e inisiadónan ku a prepará e proyekto di lei, pa hasi e adaptashonnan nesesario den e nota di splikashon, promé ku tuma mas pasonan relashoná ku e proyekto di lei akí.