Festival di Bos di Libertat 2023 ta e komienso pa asina konsientisá pueblo riba e efekto i impakto di abolishon di sklabitut.

Brion Plein, — Djasabra 30 di sèptèmber último  ‘Festival Bos di Libertat 2023’ a bira realidat. E festival ta un di e aktividatnan pa yudá konsientisá pueblo tokante abolishon di  sklabitut.

Zulaijka Brandao ta menshoná ku ‘Festival Bos di Libertat 2023’ ta un di e aktividatnan pa yudá konsientisá pueblo di e añanan di abolishon di sklabitut. Zulaijka Brandao, ta e persona ku a ser nombrá dor di Ministerio di Enseñsa, Siensia, Kultura, i Deporte pa asina yuda organisá ‘160 aña di sklabitut’. Esaki ta nifiká ku for di promé di Yüli 2023 te ku promé di Yüli 2024, ta bai  organisá diferente aktividat pa konsientisá pueblo di Kòrsou i tambe diferente edat, riba e abolishon di sklabitut. Ta bai enfoká riba e efekto i impakto ku esaki tabatin riba nos komunidat.

Zulaijka ta menshoná ku ta bai tin mas ku 173 aktividat ku lo bai tuma lugá na diferente lugá. Por ehèmpel den barionan, den skolnan, kual lo dura te otro aña. Despues di e periodo di promé di yüli 2023 te ku promé di yüli 2024, den kual ta bai konsientisá pueblo di e efekto i e impakto di sklabitut, lo sera e periodo pa asina enfoká riba e proseso di reparashon. Esaki ta nifiká ku ta bai wak e síndrome di efektonan sikológiko ku tin riba desendientenan di sklabitut.

Pa ku e periodo binidero Zulaijka a menshoná ku ta bai hasi diferente  investigashon, tin proposishon di simposio, i tambe lo wak kon ta bai duna kontenido na kon ta mira e parti di rehabilitashon. Zulaijka ta menshoná ku ‘Festival Bos di Libertat’ ta djis un komienso, pero tin hopi kos mas pa realisá. Esaki ta debí ku un efekto di sklabitut 228 aña pasá no ta reparé den un minüt, e ta tuma su tempu.

Giovanni Atalita, ku tambe ta parti di e organisashon di ‘Festival di Bos di Libertat 2023’, a bisa ku el a wòrdu aserka pa  enkargá ku e orkesta di Festival Bos di Libertat 2023’. Giovanni tin eksperiensha di organisashon di Tumba i otro festivalnan i pa e festival aki, e tabata ke zonido di Hollywood pero ku ritmo krioyo di Kòrsou.  Givonanni a menshoná ku e evento aki ta pa restablesé Tula i otronan ku a rebeldia dia 17 di ougùstùs 1795. Esaki ta nifiká ku Tula i e otronan ku a rebeldiá no lo wòrdu mirá komo kulpabel, malechor, òf burdugu pero ta wòrdu restablesé ku tur honor.

Minister Sithree van Heydoorn di Ministerio di Enseñsa, Siensia, Kultura, i Deporte, a menshoná ku e ta sumamente orguyoso di por mira un públiko asina grandi presente na e festival i tambe ku e ta orguyoso di e músikonan. E letranan di e kansionnan ta asina importante paso esaki lo bai bek na rehabilitashon di e héroe nashonal Tula. Tambe minister Sithree a menshoná ku nos historia ta importante  i ku mester konosé esaki kada dia mas mió.

E ganadó di ‘Festival Bos di Libertat 2023’ lo bai aportá na restourashon di Tula, dia 3 di òktober, por medio di su kansion i letranan.