Happy Birthday: ayera a kumpli nèt un aña ku RdK a anunsiá un fiesta ku a resultá den un fiasko.

Bullenbaai— Ayera a kumpli nèt 12 luna ku e barku COLON a trese e promé kargamentu di Fuel Oil Kòrsou. Refineria di Kòrsou (Rèk) a emití un komunikado ofisial, anunsiando e inisio di un akuerdo fuerte entre Caribbean Petroleum Refinery i RdK/CRU.

Despues di 12 luna, e kantidat di 490 mil ton di fuel oil den tankinan na Bullenbaai ta sin benta. Esei aló ménos por konkluí, despues ku Curaçao Petroleum Refinery na sèptèmber 2022 a laga trese e kargamentu Kòrsou for di Venezuela. For di e dia ei, e tankinan di Bullenbaai a keda inaktivo te awe, sin niun hende duna kuenta i rason riba inaktividat di Bullenbaai, ku ya tin mas ku 8 luna sin risibi un depchi pa uzo di e tankinan. Bullenbaai, ta unu di e aktivonan mas importante pa Kòrsou por generá divisa.

Ta kuestionando ta dikon e fuel oil mester keda asina largu den tankinan na Bullenbaai si tabatin intenshon di bend’é i kuminsá trese rendimentunan pa Kòrsou. Pasobra mas tanki ta hür ta mas rendimementunan marginal lo drenta den kahanan di CRU. Pero tantu Bullenbaai komo e fuel oil ta sin moveshon èkstra for 28 di sèptèmber 2022. E nota di kargamentu tabata fechá 17 di sèptèmber 2022 pa despues e barku sali mesora di Venezuela yega Kòrsou. Segun, Patrick Newton, den un deklarashon na Vigilante, e kargamentu tabatin asertashon di OFAC. Pero despues ku e kargamentu a yega Kòrsou na sèptèmber, riba 18 di novèmber, Raul Socorro di CPR ta risibi un konseho hurídiko si e kargamentu den Bullenbaai ta konforme OFAC. Ta asina ku pa kada kargamentu mester tin un asertashon di OFAC. Manera ta e kaso di Chevron, kual kompania a kaba di risibi lisensia pa saka krudo for di Venezuela i ta ampliando nan kargamentunan for di Venezuela pa Estádos Unídos. Newton despues ta laga abogadonan di CPR Holding splika Korte ku RdK no por tuma sèn di hür mas fo’i un otro kompania, Knob Trading pa motibu di no kumplimentu ku lisensia OFAC.

Tin sospecho fuerte ku no por bende e 490 mil bari di Fuel Oil aktualmente den tankinan na Bullenbaai pasobra e kargamentu a sali Venezuela sin tabatin un konseho òf lisensia di OFAC. Ademas ni korte no por a dedusí, despues di mas ku 5 tratamentu, KEN ta propietario di e fuel oil.  I Aparentemente hasta Chevron, ta optando pa desviá for di Bullenbaai, pa motibu di duda riba e kumplimentunan di Kòrsou ku lisensianan OFAC. Tabata riba 18 di novèmber 2022 ku Caribbean Petroleum Refinery a manda buska konseho riba esaki. Apénas 2 luna despues ku e fuel oil a drenta tankinan na Bullenbaai. Nan a risibi un konseho di abogado Luis Alvarez. CPR a hasi un petishon na Alvarez pa duna un konseho si e transborde di 490 mil bari di fuel oil entrega na Bullenbaai tabata kontra di reglamentunan imponé pa Estádos Unídos i konforme asertashon di OFAC (Office of Foreign Assets Control). For di e konseho di Alvarez a bin sali afó ku e kontrakt akuerdo pa Bullenbaai entre CPR i RdK, ta un kontrakt entre CPR i CRU. E kontrakt entre CPR i CRU ta pa disponibilidat di Bullenbaai pa almasena, krudo, diesel (low sulfur) i fuel oil.

A keda konstatá ku doño fuel oil,  United Petroleo Corporation (UPC) di Panamá, no tin niun akuerdo ku CRU dirèkt. No ta konosí si tin un kontrakt tampoko entre CPR i UPC pa transporte di e fuel oil pa Bullenbaai. Aparentemente esei tabata un otro kompania ku tabata envolví ku yama Knob Trading. Entretantu e fuel oil ta sigui den tankinan na Bullenbaai for di sèptèmber 2022 anto UPC a bati bankarota. For di Mart 2023, Kòrsou no a risibi ni un sèn dòler,  ofresiendo servisio pa almasena e fuel oil kontrabanda den tankinan na Bullenbaai.