WILLEMSTAD – Fundashon Kas Popular (FKP) a risibí órden hudisial di Korte den Apelashon den un kaso sivil pa paga sigur 147 mil florin na gastunan di e prosedura sivil den Korte di Promé Instansia i di Apelashon, pero prinsipalmente gastunan di daño ku hürdonan di un kas sosial a sufri despues ku inhustamente FKP a laga basha e kas abou.

T’asina ku un hòmber a kuminsá hür e kas na 1973 serka gobièrnu (teritorio insular). Na 2012 FKP a laga basha e kas abou. Porlotantu a destruí tur trabou di renobashon ku e hòmber i e muhé abitante di e kas a hasi. Na 2014 Korte den Apelashon a husga durante un huisio sumario ku no a kibra e kontrakt di hür legalmente, i ku FKP riba su mes a disidí di saka tur hende for di e kas obligatoriamente, violando di e manera akí e asina yamá ‘Wetboek van Burgerlijke Rechtsvordering’.

Den e prosedura akí, e hòmber i e muhé a eksigí pago di diferente suma, prinsipalmente komo daño perhuisio. Hof a tuma un desishon provishonal dia 8 di novèmber aña pasá i ayera a tuma un desishon definitivo den e kaso akí. Ta trata di un kaso ku e hòmber i muhé a entamá kontra tantu gobièrnu di Kòrsou, komo FKP. FKP i gobièrnu tambe a entregá demanda kontra e siudadanonan. Nan no a haña rason.

Tur dos partido a pidi Hof pa hala aden bèk e desishonnan tumá den e sentensia provishonal di novèmber aña pasá, pero Hof no a mira motibu pa esaki i a mantené tur desishon manera nan ta tumá. Korte no a mira motibu tampoko pa laga hasi investigashon adishonal pa determiná si e pòstnan ku e pareha e entregá di gastu riba kua Korte ya a tuma un desishon, ta eligibel pa kompensashon. E siudadanonan tabata ke oumentá nan demanda despues dje sentensia provishonal, pero Hof a rechasá e oumento akí pasó e desishonnan anterior ya tabata aplikabel riba e oumento di e demanda nobo.

Segun Korte, no opstante ku tabatin trabounan di destrukshon na 2012 i ku tin limitashonnan den e pruebanan presentá tokante e kondishon dje kas promé ku e trabounan di destrukshon a kuminsá, Korte a disidí pa no nombra un eksperto. E periodo transkurí for di e trabounan di destrukshon na 2012 i e gastu i retraso ku lo bai resultá for di e nombramentu di un eksperto, tabata faktornan determinante den e desishon akí. Hof mes a kalkulá e daño komo konsekuensia di e trabounan di destrukshon pa basha e kas abou.

Korte a kalkulá e daño komo konsekuensia di e trabounan di destrukshon na 75 mil florin. E kalkulashon akí tabata basá riba e gastunan di reparashon i di pone e kas den e kondishon ku e tabata promé ku a kuminsá ku e trabounan di basha esaki abou. E naturalesa dje daño, ku otro palabra e plaser di biba den e kas, a hasi difisil pa saka afó kiko e presupuesto eksakto ta i p’esei mester a kalkulá e daño.

Otro gastunan

Banda di e gastunan kousá pa e trabounan di destrukshon (75 mil florin), Korte a otorgá otro pòstnan ku e siudadanonan a entregá komo daño tambe, manera daño na produktonan riba e tereno dje kas (4 mil florin), muebelnan den kas (20 mil florin), produktonan ku por a saka afó promé (5 mil florin), e echo ku no por a usa e kas temporalmente (2 mil florin), gastunan pa un fotógrafo (500 florin), awa/koriente (500 florin), pago sin fundamento (761,25 florin) i gastunan di un pintura kubrí (12.778,80 florin). E pòstnan akí a resultá den un suma total di 119.278,80 florin, inkluyendo interes legal kontando for di mart 2015, i gastunan ekstrahudisial pa kobra e suma (1875 florin), inkluyendo interes legal kontando for di novèmber 2019.

Korte a kondená tantu FKP komo gobièrnu solidariamente pa paga e sumanan otorgá n’e siudadanonan. Esaki ta nifiká ku tantu FKP komo gobièrnu ta responsabel pa paga e gastunan akí huntu. Korte a kondená tantu FKP komo gobièrnu pa paga gastunan di proseso den tantu Korte di Promé Instansia komo den Apelashon. Ta trata akí di 1913,50 florin na gastunan adishonal den Promé Instansia i di 4 mil florin na salario di abogado dje siudadanonan. Ademas ta trata di 2678 florin den Apelashon na gastunan adishonal i 17.500 florin na salario di abogado. Un suma total di eksaktamente 147.245,30 florin, sin konta e interes legal for di 2015 i 2019.