Diferente komersiante sin fondo di garantia no ta yegando na kapital pa invertí.

Willemstad,– For di e promé presupuesto pa añanan binidero tin fondo aloká pa un instrumento di garantia pa asina por stimulá i sostené empresanan chikí i mediano (MKB).

Segun e promé konsepto di presupuesto pa e periodo nobo di 2024 pa 2027 tin un sèn presupuestá pa asina por invertí den un fondo di garantia di krédito/ instrumento di garantia. For di aña 2025 empresarionan lo wòrdu yudá ku kapital inisial pa kuminsá un negoshi di MKB òf pa reforsá un negoshi. E sèn presupuestá ta un kantidat entre 13 mion i 19 mion.  Dor di introdusí un instrumento di garantia, gobièrnu por aportá na realisashon di proyektonan produktivo den diferente sektor.

Te ku na e momentu aki Kòrsou no tabatin un instrumento di garantia pa empresarionan chikí òf mediano riba nivel nashonal. E fondo di garantia aki lo sigurá ku empresanan chikí i mediano por haña un fiansa for di e sektor finansiero muchu mas fásil. Konseho di Konsulta ta konsehá gobièrnu pa inkluí informashon mas konkreto tokante e fondo di garantia den e nota di e presupuesto ku lo wòrdu aprobá pa aña 2024.

Gobièrnu tin komo meta prinsipal pa mehorá e funshonamentu di e merkado kapital pa empresanan chikí i mediano ku no tin sufisiente seguridat por haña un préstamo di e sektor finansiero. Dor di introdusí un instrumento di garantia, gobièrnu por aportá na realisashon di proyektonan produktivo den diferente sektor.

Pa por uza e instrumento aki, gobièrnu mester konsiderá i establesé un fondo di garantia.Dor di establesé un fondo di garantia, gobièrnu ta kontribuí di un manera konkreto na un défisit ku tin den merkado kapital. No opstante, segun e gobernashon, e fondo aki lo hunga un ròl fundamental den merkado kapital. Segun Konseho di Konsulta di Kòrsou no ta evidente ainda den kua fase e realisashon di e fondo aki ta. Tampoko no ta evidente kon e gastunan di e fondo di garantia aki por resultá den gastunan visibel riba e presupuesto pa 2024.