WILLEMSTAD – Minister di Enseñansa Sithree “Cey” van Heydoorn resientemente a kontestá preguntanan ku Parlamentario Gilbert “Gibi” Doran a hasi for di yüni aña pasá tokante Universidat di Kòrsou (UoC).

El a indiká entre otro e kantidat di studiantenan ku tin na e universidat, e tipo di estudio ku nan ta sigui i si nan a terminá nan estudio òf nò i e motibu pa esaki. For di sifranan ku e Minister a suministrá, Vigilante por mira ku ta for di 2018 e kantidat di studiante ta bahando. Te ku 30 di aprel di e aña akí, UoC tin 1345 studiante inskribí. Ademas el a mustra riba e echo ku e studiantenan tabata drenta universidat mihó prepará ántes.

Na 2018 tabati 1477 studiante inskribí na UoC. Na 2019 esaki a baha te na 1364. Na 2020 e kantidat a sigui baha te na 1262, pa despues subi un tiki bèk te na 1276 na 2021. Aña pasá tabatin 1231, ku ta un bahada kompará ku e aña anterior. I e aña akí e kantidat a subi poko bèk te na 1345 studiante inskribí.

Doran tabata ke sa ademas si ta bèrdat ku ta trata studiantenan malu i ku ta reina hopi disgustu serka studiantenan. El a pidi e rapòrt ku resultadonna di e asina yamá ‘studenten tevredenheidsonderzoek’. Minister Van Heydoorn: “UoC tin un departamentu di Servisio na Studiante (SA) ku tin entre otro un dekano pa studiante ku ta atendé reklamonna di studiante òf puntonan di preokupashon. Sí, tin studiante ku tin problema ku nan estudio òf ta disgustá. Pero tin e posibilidat pa e studiante entamá su keho konforme e prosedura di keho pa studiante. Sí, kada 3 aña ta tene un evaluashon di e grado di satisfakshon bou di studiantenan (STO 2021 komo añadí).

Riba e pregunta kuantu e rendimentu ta pa kada fakultat i pa kada direkshon di estudio, di studiantenan ku ta drenta UoC i terminá ku éksito, e Minister di Enseñansa a kontestá ku e kantidat di studiante ku ta kaba nan estudio nominal, pues den e kantidat di añanan manera stipulá di sea 3 òf 4 aña, ta un promedio di 27%.

Kalidat

Pa loke ta trata e nivel i/òf kalidat di UoC kompará ku UNA di ántes, e Minister a splika un diferensia. Doran tabata ke sa si e nivel a subi òf baha. “E nivel di UNA di ántes i awendia UoC ta bastante altu. E diferensia grandi ta ku ántes tempu di UNA, e studiantenan tabata drenta ku diploma di HAVO/VWO i pa Fakultat Tékniko MTS ku pakete di HBO, pues e studiantenan tabata drenta mihó prepará di moda ku e proseso edukashonal por a trata tópikonan mas profundo. Na momentu ku lei a kambia i a duna akseso na UNA/UoC ku diploma MBO-4, por a nota un kambio den e nivel di preparashon ku e studiantenan ta drenta kuné, kousando ku UNA/UoC mester a eliminá bastante definsiensia ku tabatin serka e studiantenan.”

Segun e Minister, di otro banda UNA/UoC a start ku e proseso di akreditashon dor di Nederlands Vlaams Accreditatie Organisatie (NVAO) ku ta un instituto internashonal ku ta bin midi e kalidat di programa di UNA/UoC kontra normanan internashonal di enseñansa superior i sientífiko. “UNA/UoC a optené un evaluashon positivo pa kasi tur su programanan di 2010 bin ariba. E konklushon ta ku e programanan ta di nivel internashonal i konforme esaki, UoC ta entregá graduadonan ku ta ‘startbekwaam’ konforme nan programa akreditá. E punto di salida akí ta ku den trabou/práktika nan ta sigui desaroyá. Studiantenan ku kontinuá ku nan Master na Kòrsou òf den eksterior ta skor altu dor di e base fuerte ku nan a haña den nan estudio di Bachelor na UNA/UoC.

Stòp estudio

Riba petishon di Parlamentario Doran, Minister Van Heydoorn a duna un bista tambe di e kantidat di studiantenan ku no ta kaba nan estudio anualmente dor di stòp òf nan ta kita for di skol. Na 2018 e kantidat ku sí a finalisá tabata 299, na 2019 un kantidat di 244 a kaba nan estudio i e kantidat akí a baha te na 218 na aña 2020. E Minister ta menshoná 3 motibu: pa motibu personal hopi biaha relatá na asuntunan familiar (29%); e studiante ta skohe pa bai den eksterior i studia aya (26%); òf e studiante ta stòp ku un estudio i skohe pa hasi un otro estudio den UoC mes (9%).