“Mònster”: Kòrsou a konstruí un “mònster di 640 mion florin ku te ainda nos por paga bèk.

Otrobanda– E situashon finansiero na Curaçao Medical Center, anke latento, ta sigui preokupante.

E instituto di kuido, no ta alkansá paga retraso di hür lokual na su turno ta okashoná e entidat di Mobiliaria Inmóbil sigui den problema pa paga e fiansa di 640 mion florin. Pero no ta awor, sino for di 2019 no a nota e atvertensianan.

Despues di diferente análisis i rapòrtnan di eksperto, inkluso NZA di Hulanda i KMPG, a keda konstatá ku pa por manehá CMC/HNO, gerensia di e instituto mester sea subi tarifa di servisio ku publiko i klientenan  tei paga pa servisio, òf tuma medidanan interno. Ku otro palabra baha gastunan di operashon. Ámbos posibilidat ta mustra algu difísil te ainda na 2024.

Esaki ta indiká ku CMC ta keda den problema serio. For di periodo di transishon,  pronóstikonan makro riba nan kuenta di gastunan operashonal di kuido, tabata saliendo 60 mion florin mas karu pa manehá. E korekshon riba pronóstiko di gastunan total na 2018 pa Sehos por ehèmpel  a indiká 180 mion florin miéntras esun di HNO korelá na 2020 a duna 240 mion florin. E oumentonan a toka mayoria parti na oumento den gastunan di personal 11 mion, hür di kompleho nobo 33 mion, despresio di ekipo 6 mion florin i gastunan di interes 5 mion. Esakinan tabata for di 2019, sin ku e gobièrnunan a tuma paso òf desishon.

Te ku presente, ainda no tin niun idea kon ta bai finansiá e oumento. Un kosto di operashon total na 240 mion florin ta karga diferenshá pa kapita na Kòrsou un total di 1.300 florin mensual. Esaki ta nifiká ku por lo general yunan di Kòrsou tei karga e gastunan a operá CMC na 1.300 florin pa kabes, lokual ta un suma hopi haltu i kasi no tabata finansiabel segun e kálkulonan.

CMC,  no ta keda na niun otro opshon, sino di hisa tarifa di nan servisionan. Konsekuentemente, tur intermediario den merkado di seguro, pa por “comply” ku eksigenshanan di solvabilidat tin di oumentá nan tarifa na kliente. Esaki ku tur probabilidat SVB tambe. Resultado: kuido médiko na Kòrsou mester oumentá pa finansiá CMC. Esaki ta un kestion di tempu pa realisá.