Oranjestad,– Na Aruba nan a anunsiá basta dia pasa ku entrante promé di yüni (awe), pasaheronan residente di e isla ta keda eksonerá di hasi un PCR tèst, pues nan no mester hasi e tèst aki ora ku nan regresá Aruba.

Mester bisa su ku esaki ta konta solamente pa pasaheronan ku ta kumpli ku tres rekisito ku a keda imponé di parti di e departamentu di salubridat públiko i e krísis team ku ta esnan enkargá ku maneho di e efektonan di Covid-19 na Aruba.

E rekisitonan aki:

• Mester ta residente di Aruba
• Mester ta registrá na AZV
• Ta bakuná na Aruba i a risibí un sertifikado di vakunashon mas ku 14 dia promé ku e biahe bèk pa Aruba

Pasaheronan ku ta deseá di hasi uzo di e posibilidat aki tin ku indiká esaki na momento di registrá via e online ED card system (https://edcardaruba.aw).

• E sistema digital aki, esta e online ED card system tin ku wòrdu yená dentro di 72 ora promé ku e biahe di regreso pa Aruba. Ta Kòrda e pasaheronan aki pa ora di nan yegada na Aruba, pa tin nan sertifikado di vakunashon digital disponibel riba e Aruba Health App i tambe un kopia físiko komo backup.