WILLEMSTAD – Frakshon di PAR a aserká Presidente di Parlamento Charetti America-Francisca ku e petishon pa un reunion di Komishon Sentral tokante posibilidatnan pa krea empleo i entrada riba término kòrtiku ku refineria.

Pa e reunion akí Quincy Girigorie, Steven Croes, Ana Maria Pauletta i Zita Jesus-Leito ke pa invitá gerensia di Refineria di Kòrsou (RdK) i Curoil NV, pa nan duna un presentashon tokante e ideanan ku nan ta manehá pa kumpli ku e instrukshon di Minister.

Manera ta konosí durante e reunion públiko di 16 di yanüari último, reanudá dia 3 di febrüari último, Minister Presidente Gilmar Pisas a informá Parlamento, ku el a duna instrukshon na e kompanianan anónimo di gobièrnu, RdK i Curoil pa ‘mas pronto posibel kuminsá hasi negoshi ku e refineria’. “Nos ta komprondé for di e ekspreshon akí, ku tanten RdK ta bezig ku e di 6 proseso pa yega na un operadó pa refineria, Minister Pisas ta pensando pa mas pronto posibel (a korto plaso) usa e refineria òf e tereno ku ta pertenesé na RdK pa vários tipo di negoshi ku lo generá entrada i empleo pa komunidat di Kòrsou i e mas ku 2000 personanan ku a inskribí for di mei 2022 pa traha na refineria i te ainda ta wardando.”

Frakshon di PAR ta sostené e pensamentu akí kompletamente i ta dispuesto na sostené akshonnan konkreto den e kuadro akí. “Realidat ta ku historia ta siña nos ku kualke proseso pa yega na un operadó pa refineria, asta unu aselerá, lo tuma su tempu pa finalisá i komo tal ta sumamente importante pa na e mesun momentu ku ta bezig ku e trayekto akí, kuminsá trayektonan paralelo a korto plaso ku por generá entrada i empleo pa komunidat. Mirando ku Minister Presidente a rekonosé e falta di informashon na komunidat i Parlamento a kontribuí na e imágen negativo rondó di e proseso di negosiashon ku gobièrnu a hiba na nòmber di komunidat ku CPR, ta importante pa Parlamento i komunidat ta informá di e pensamentunan akí, te kaminda ta posibel.”