Dimitri Cloose, direktor di Fundashon NAAM a menshoná ku hopi kos nos no ta komprondé mas. Den e selebrashon di abolishon di aña di sklabitut nos a wak Tula so, pero no ta Tula so a sobreviví i a hasi pa a yega kaminda e ta.

Willemstad, — Dimitri Cloose, direktor di Fundashon National Archaelogical Anthropological Memory (NAAM), ta splika kiko ta resiliensia i ku mester wak e perspektiva di nos pasado di sklabitut den su totalidat.

Fundashon NAAM ta hasi investigashon di historia i kultura di barionan i ta dokumentá esaki. Dimitri Cloose, direktor di Fundashon NAAM, a menshoná ku por sierto den bario di Nieuw Nederland tin hopi personanan konosí ku a sali for di e bario. Cloose a duna ehèmpel di algun personanan konosí manera por ehèmpel, nos gobernadora, Elis Juliana i èks minister-president Daniel Hodge. Dimitri Cloose a agregá ku  ta hendenan ku a biba na e kasnan di palu den bario di Nieuw Nederland.

Dimitri Cloose a menshoná ku Fundashon NAAM ta investigá e hendenan ku ta biba den bario pa asina bin ku e parti di historia i basa esaki riba lokual ta bèrdat di loke a i ta sosodiendo den barionan di Kòrsou. Den kuadro di investigashon Dimitri Cloose ta menshoná ku ta wak e perspektiva mas grandi di e historia den kual ta aloká un persona òf evento ku a sosodé den pasado den e bario. Cloose a menshoná ku si no dokumentá susesonan di pasado e historia di barionan ta bai pèrdí.

E direktor di NAAM a sigui splika ku nos tin mas ku 500 aña trahando riba nos resiliensia i mester kòrda ku den pasado ku tiki nos a traha hopi. Cloose a splika ku ta yama esaki ‘cultuurverschaarste’ ya komo for di tiki nos tabata kreativo si i for di tiki nos a sobreviví. Dimitri Cloose a menshoná ku hopi kos nos no ta komprondé mas. Den e selebrashon di abolishon di aña di sklabitut nos a wak Tula so, pero Dimitri Cloose a menshoná ku no ta Tula so a sobreviví i a hasi pa a yega kaminda e ta.

Ata nos ta papia Papiamentu, kual ta resultado di e lenga ku a wòrdu kreá dor di nos hendenan. E aspektonan di nos pasado (entre otro muzik i kuminda)  ta mas kos pues ku a sobreviví atraves di periodo di sklabitut i ta kosnan ku ta demonstrá nos resiliensia. Direktor di Fundashon NAAM a duna un otro ehèmpel for den kual e ta menshoná ku tin partinan fuerte di nos pasado tambe ku a sobreviví den kual por ehèmpel personanan no a bringa. Den un òf otro palabra Dimitri Cloose a menshoná ku tur esakinan tambe ta demonstrá resiliensia di nos hendenan.

Dimitri Cloose a menshoná ku investigashon den kuadro di nos pasado ta importante pa nos komprondé e perspektiva den su totalidat di nos historia.