DEN HAAG—Hulanda ta investigando kon pa buska muchanan heridá na Gaza pa tres Hulanda pa haña kuido i akomodashon.

Asina minister demishonario di Asuntunan di Eksterior Slot a bisa despues di un enkuentro ku su koleganan den Union Oropeo na Brussel. No ta kla ta di kuantu mucha ta papia. Otro paisnan den Union Oropeo tambe tin plannan similar. Segun minister Slot e plan mester bai den bon koperashon ku organisashonnan humanitario manera Rode Kruis i Dokternan sin frontera.

Ta buska aprobashon ku Israel i Hamas via kanalnan diplomatiko. Minister di Salubridat demishonario Kuipers a bisa ku Hulanda ta dispuesto pa yuda e muchanan si e petishon drenta. E petishon no a drenta segun Kuipers. Si yega asina leu e sentro di kordinashon di pashentnan lo wak hospitalnan tin lugá pa e muchanan. Organisashon di Nashonnan Uni Unicef ta bisa den un resumen resien ku e guera na Gaza a kosta bida di mas ku 4000 mucha i 6800 ta heridá. Den e hospitalnan na Gaza ku ta habri ainda tin skarsedat di material pa yuda tur e viktimanan. Egipto ta hunga un ròl importante den suministro di material di emergensia na habitantenan di Gaza. Kuipers a indiká na su kolega egipsio siman pasa ku Hulanda ta kla pa duna asistensia adishonal. E materialnan ku tin mas nesesidat di dje segun Egipto ta pa sirugia di trauma, pero ku Hulanda no tin na stok tur ora. E ministerio di Salubridat, Bienestar i Deporte ta investigá si por haña e materialnan den otro pais Oropeo.