DEN HAAG—Gabinete demishonario ta investigando posibilidat pa saka hulandesnan for di Israel ku vuelonan charter.

Segun e ministerio tin bista di gruponan ku kier sali for di Israel. Ta trahando duru pa inventarisá kuantu hulandes mas kier sali for di Israel segun e ministerio. Hulanda ta pensa riba koperashon ku otro paisnan i kompanianan di aviashon. No ta konosí kuantu hulandes tin den Israel of teritorionan palestino. Registrashon no ta obligatorio. Cyprus ta indiká ku den evakuashonnan e kier funshoná komo transito pa paisnan di Union Oropeo. E pais ta keda ost di laman Mediteraneo serka di Israel. Hopi kompania di aviashon a kanselá nan vuelonan na Israel relashoná ku e situashon di guera. Segun informashon e kantidat di vuelonan pa/for di aeropuerto internashonal di Tel Aviv a baha ku 20%. Vuelonan ku sali mayoria biaha ta yen. KLM a kanselá tur vuelo na Tel Aviv te ku djárason.

Transavia i EasyJet a kansela tur vuelo te djaweps. Ayera a bira konosí ku alrededor di 28 alumno i 4 maestro di un skol na Rotterdam kier sali for di Israel. Nan tabata ku tarea di skol i mester a regresa djabièrne. No ta konosí unda nan ta. 20 studiante i 3 dosente di un skol avansá na Ede tabata den un kloster na Jeruzalem. Den un hotel djis pafó di Jeruzalem tin desena di miembro di un misa protestan di Apeldoorn. Nan mester a regresa djaweps pero nan vuelo a keda kanselá. Mas pais a tuma desishon pa buska nan siudadanonan entre otro Italia, Polonia, Hungaria, Rumenia i Bulgaria.