Punda—Si Gobièrnu di Kòrsou, lo tuma e fiansa kombiná di Ennia i Covid, Hulanda lo gana 800 mion  florin  na interes despues di 20 aña. Esaki ta saliendo for di punto di bista ku Hulanda lo duna e fiansa kombiná na un interes di 3.6%.

En total, Kòrsou lo a fia 2 miar florin i paga bek e suma di 2.8 miar. Mensual e kota di pago lo bira 11 mion florin, lokual ta kasi 9% di lokual Kòrsou ta risibi na entrada mensual. Téknikamente, e repago ta bira un peso di 20 aña riba nos presupuesto di likides koriendo riesgo di limitá komportashon di gastu di Gobièrnu.

Ayera Parlamento di Kòrsou, den oranan di mèrdia a trata e reunion públiko riba Ennia i fiansa ku mester a tuma pa salbaguardiá e kompania di seguro. Parlamento di Kòrsou, no tabatin un bon presentashon ayera, lagando atras hopi diskushon tékniko nesesario riba e konsekuenshanan di e fiansa. Ta trata di un fiansa no produktivo ku ta pone Kòrsou paga pa un fiansa no produktivo.

Segun miembro di Parlamento, Gilbert “Gibi” Doran, kier a pone preshon pa tuma e fiansa i laga Kòrsou sera su mes stròp. Doran a bisa ayera, “nos ta keda e katibunan” moderno. E miembro di MFK ayera a kuestioná e oferta di Hulanda pa fia na 5% miéntras tin mihó oferta di interes riba merkado hulandes mes, esta Hulanda riba e merkado di kapital. Ayera Doran tabata e promé parlamentario na turno a kuestioná e fiansa i kapasidat di Kòrsou pa paga bek.