Riba e gráfiko aki por mira e ganashi ku tantu luna mart komo e promé kwartal dje aña aki ta basta haltu kompará ku añanan anterior.

WILLEMSTAD — Segun un komunikado di Servisio di Impuesto, e kobransa riba impuesto di ganashi, dje promé kwartal ta muchu haltu ku premirá. Den luna di mart esaki tabata 48.7 mion florin mas tantu ku aña pasá i alabes e ta 32.7 mion florin mas tantu di loke ministerio di Finansa a presupuestá.

Manera Stichting Belastingaccountantsbureau (SBAB), Inspekshon di Impuesto (belastingdienst), Ontvanger i Duana a ripití e último lunanan, a traha duru pa subi e ganashi di impuesto. “Un sistema di atendé ku a duna resultadonan bisto. E subida di mart kompará ku aña pasá, ta pa motibu di e sumanan di impuesto di ganashi (27.3 mion florin) i di benta (ob, 11.3 mion florin).”

E impuesto di ganashi ta 59.4 mion florin na luna di mart, pa motibu ku e fecha di pago pa tantu e aangifte definitivo di e impuesto aki pa 2020, komo e aangifte temporal pa 2021, a kai riba 31 di mart dje aña aki. Dje impuesto di benta (ob) di 44.2 mion florin, Duana a kobra e suma di 12.1 mion na importashon.

E tareanan di compliance di SBAB entretantu a keda ampliá. Banda dje ob, tin tambe impuesto di salario i primanan sosial ku lo mester sòru pa subida dje ganashinan. Den e rapòrt di maneho di Servisio di Impuesto di luna mart, lo amplia riba e diferente akshonnan ku ta eksplorando pa subi e ganashinan di impuesto i di primanan di forma struktural. I alabes riba mehorá e servisio na pagadónan di impuesto. E rapòrt di maneho di mart tambe lo keda publiká, meskos ku e promé rapòrt di maneho tokante luna febrüari.

E rapòrt di maneho di mart lo keda publiká mas lat den e luna aki. Pa medio di e rapòrt aki ta duna kuenta i rason na pueblo. “Ku e forma no usual di transparensha aki pa pueblo, tur hende por wak huntu den e kushina di Belastingdienst. Tin pará kla kua akshonnan a tuma pa kita e atraso atministrativo, i tambe kua a tuma pa evitá trabounan innesesario (fayonan). Alabes ta pidi pueblo pa kumpli ku su debernan fiskal, p’asina gabinete Pisas 2 por realisá e maneho formulá.”