Gilbert Martina, direktor di CMC a kompartí ku e problema mas prinsipal di CMC ta, ku e presupuesto di kuido ku CMC ta haña pa duna kuido na pashèntnan sigurá dor di gobièrnu, no ta sufisiente. 

Willemstad, — Gilbert Martina, direktor di CMC tabata presente den luna di novèmber último den programa di Ekonomia di Vigilante pa asina kompartí resultadonan di e investigashon di CMC.

Gilbert Martina, direktor di CMC a kompartí ku si e hospital ta haña mitar di loke ta kosta pa drumi un anochi na e hospital, por konkluí dikon CMC no por kubri su gastunan. Gilbert Martina  a menshoná ku KPMG a hasi un investigashon na kual a sali dilanti ku e preis pa un pashènt ta drumi den hòspital por ehèmpel ta alrededor di 1542 florin,  pero si bai mira kiko ta haña den presupuesto di gobièrnu, esaki ta hopi mas ménos i ta alrededor di  750 florin.

Martina a indiká ku gobièrnu mester aportá alrededor di 280 mion florin komo pais pa asina por kubri gastunan di e hospital, pero ku esaki no ta sosodiendo sigur un kuater aña kaba. Martina ta direktor general di CMC for di aña 2021 i promé ku esaki e tabata 2 aña responsabel pa e parti di transishon di e hospital. E direktor a kompartí ku CMC ta sostenibel i ku e pèrdida ku e hospital tin ta dor di 7 motibu di kual e problema mas prinsipal ta e presupuesto di kuido ku CMC ta haña pa duna kuido na pashèntnan sigurá dor di gobièrnu.

Gilbert Martina a indiká ku e fondo di seguro sosial no ta sufisiente i ku gobièrnu mester aportá na e fondo si seguro sosial aki ku ta kasi 280 mion florin. E direktor di CMC a duna di konosé ku e primanan sosial ku nos ta paga pa haña kuido tampoko no ta sufisiente. Segun Gilbert Martina e problema nashonal ku nos tin pa lokual ta trata nos hospital nobo ta sintá na e presupuesto di CMC. Direktor di CMC ta kompartí ku si mester hisa e presupuesto di kuido ku CMC ta haña pa duna kuido na pashèntnan sigurá dor di gobièrnu, mester hisa e ‘landsbijdrage’ tambe.

E direktor a kompartí ku 65 porshento di gastunan di hospital ta gastunan fiho dor ku konstrukshon di e hòspital a wòrdu finansiá kompletamente ku debe i ku niun sèn no a sali for di saku di gobièrnu. Gilbert Martina a duna di konosé ku tin alrededor 44 pa 45 mion na gastunan di kapital ku ta un montante sumamente haltu. E direktor a duna di konosé ku e hospital ta kore diferente rísiko di kual unu ta sèn pa mantenshon i di reserva pa aparatonan ku mester kumpra den futuro. Segun Gilbert Martina, esaki ta un rísiko agudo di kontinuidat.