Parlamentario Elvin Gerard  a hasi un bishita anteriormente na Minister di GMN SR Javier Silvania i Inspecteur Dr Keli riba e asuntu ku dòkternan di kas ku no a akudí na e famia ku a bati bèl pa nan familiar ku tabata malu.

Willemstad, — Un pashènt di 90 aña bibá na Banda Bou a fayesé den siman tras di lomba i segun parlamentario Elvin Gerard, e fayesementu ga debí ku dòkter di warda no a akudí na e kas.

Dia 18 di desèmber parlamentario Elvin Gerard di frakshon PNP a dirigí un karta na minister Silvania den kual e a kompartí su preokupashon pa loke ta trata un otro kaso tokante di servisio di dòkter di kas.  Ta trata aki di un kaso di un mener di 90 aña ku ta biba na Bandabou. A yama dòkter di kas ku ta biba pariba, pero e dòkter a bisa pa pashènt tuma paracetamol i warda te djaluna ora esaki por bai su dòkter di kas. E dòkter a opta pa no bai.

Elvin Gerard a reflehá den su karta dia 18 di desèmber riba un kaso anterior den kual e a indiká ku e referí na un karta ku e a manda minister Silvania riba 26 di novèmber puntrando minister Silvania si e a tuma nota di un kaso lamentabel. Ta trata aki di un kaso ku a tuma lugá den kual un señora a bin pèrdè su bida despues ku e persona aki a sinti malu i familiar a tuma kontakto ku dòkter di warda i ku segun e famia nan no a yega na tempu pa por a wak e pashènt.

Den karta di 18 di desèmber, parlamentario Elvin Gerard a indiká ku despues di e kaso lamentabel aki a sinta huntu ku minister Silvania i inspektor dr. Keli pa averiguá por medio di un investigashon kiko a sosodé den e kaso kaminda dòkter di warda no a akudí na e pashènt su kas. Segun Inspecteur dr. Keli un di e dòkternan ku ta wòrdu yamá mester a aserká e kliente. Dr. Keli ta lamentá ku ningun no aserka e kliente i e kier sa kiko ta motibu ku no a bishitá òf duna oido na e pashènt ora ku famianan a bati bèl i splika den kua kondishon nan ser kerí tabata ta.

Inspecteur Dr Keli a bisa ku aki 3 luna e investigashon lo tabata kla pa asina averiguá kiko a bai robes ku e dòkternan ku no a akudí pa wak e famianan di kual nan ser kerí tabata malu. Elvin Gerard ta puntra den su karta dirigí an minister Silvania, ki plan minister tin pa e situashon menshoná miéntras e investigashon ta kanando. Tambe e parlamentario ta puntra ken por pone responsabel momento ku un dòkter di kas no sali pa wak un pashènt i e pashènt aki bin fayesé. E parlamentario ta puntra tambe si minister Silavnia su intenshon ta pa sigui tolerá e kasonan aki.

Riba 1 di mart 2024 lo haña rapòrt di e investigashon ku Minister Silvania a laga hasi via di inspectie pa wak kiko a bai robes den e kaso lamentabel ku a sosodé anterior i ki paso lo bai tuma.