WILLEMSTAD,– Parlamentario Gilbert Doran kier tres un aklarashon di su parti pa loke ta biahe nan di parlamentarionan.

“Mi tin 6 aña sin biaha ku parlamento, paso for di dia ma drenta parlamento ku ma bai Colombia, ora ma regresá mi a bisa lider di MFK e tempu ei señor Gerrit Schotte ku ami lo no biaha mas pasó ami ta haña ku nos ta un pais den problema finansiero”, asina e parlamentario pa FK a duna di konosé. Gilbert ta bisa ku maske kon splika ku parlamento tin su presupuesto, e ta haña ku e sèn destiná pa biahe konstante ei, por wòrdu uza pa otro destinashon ku meresé yudansa finansiero agudo.

Pues Doran ta splika ku despues di esei, nunka mas el a drenta un avion ku òf pa parlamento di Kòrsou.

“Mi ta papia di 2017 pues ta 6 aña kaba. Mi a bisa esaki tur kaminda i tambe den reunion di parlamento. Mi ta respetá ponensia di kada un ku si ta haña oké pa nan biaha”, asina Doran ta sigui bisa.

E ta bisa ku su persona en todo kaso no ta biaha ku sèn di parlamento i ku dia e biaha pa bai kualke aktividat di parlamento, pueblo mester sa for di awor ku e lo hasi esaki ku su sèn i no sèn di parlamento. “Esaki ta djis pa aklará posishon di Gilbert Doran, respetando tur otro hende”, asina e parlamentario a tèrminá bisando.