Segun Parlamanetario Doran mester bini ku un solushon pa ku violensia na skol entre e alumnonan.

WILLEMSTAD – Parlamentario pa frakshon di MFK Gilbert Doran a manda un karta ku diferente pregunta tokante violensia na skol pa Minister di Enseñansa, Siensia, Kultura i Deporte (OWCS) Sithree van Heydoorn.

Esaki ku segun Doran ta un tema ku sigur ta bastante komentá e último dos simannan, ta esun di violensia bou di nos hóbennan. Mirando ku sigur na dos okashon kaba mester a intervení na skolnan pa ku problemam ku a sigur entre hóbennan, Doran a aserká e Minister.

“Defakto, e tóiko akí riba su mes no ta nada nobo, ya ku nos komunidat a konosé un kantidat di problema bou di nos hóbennan i sigur na porta di skol, ku no tabata na agrado di niun persona. Sinembargo, loke awó ta hasiendo peleanan na porta di skol un ‘fenómeno nobo’ ku kada bes ta poniendo mas énfasis riba ‘ta agresivo i ta pekuliarmente violento’. Asina pues tabata e kaso ku algun alumno a resultá te asta na CMC pa tratamentunan médiko mas avansá. Loke aparta di ta sumamente penoso, ta tambe algu ku ya ta eksigí un opservashon mas krítiko i rigoroso, pa asina purba na evitá e tipo di konfliktonan asina’kí.”

Doran ke sa di Minister Van Heydoorn si e parti di seguridat na skolnan ta kai bou di su responsabilidat i si t’asina, kon e tin pensá pa resolvé e problema akí. I si no t’asina e ke sa ki posibilidat tin pa Minister Van Heydoorn intervení i yuda pa solushoná e problemátika akí. Ademas e ke sa dje Minister kiko segun e por ta e solushon riba término kòrtiku, pa asina evitá ku hóbennan ta lanta violentamente kontra otro.

“Nos ta pará dilanti mas ku mitar di un aña eskolar kaba, unda manera ya menshoná, tin kosnan ku no a kana masha bunita.” Pa e motibu akí Parlamentario Doran ke sa di Minister di Enseñansa si tin un plan riba término largu pa e aña eskolar nobo, kaminda huntu ku Minister di Hustisia lo bai trata na evitá tipo i konfliktonan asina’kí. I ten kon leu por bolbe embolbí mayornan den skolnan sekundario, manera tabata pasa mas regular antes.