DEN HAAG—Konsorsio Air France-KLM a genera 300 mion euro di invershonistanan pa drecha e situashon finansiero.

Pero gobiernunan hulandes i franses no a partisipá. Ku esaki e gobiernunan a tuma e rísiko ku nan interes den e kompania ta bira mas chiki i pues nan tin ménos di bisa den e kompania. E kompania mester di èkstra fondo pa drecha su posishon di kapital. Air France-KLM despues di e perdidanan den añanan di corona tin un kapital negativo. Esaki por kousa problemanan riba término largu, pa e motibu aki e kompania ta bende akshonnan. Ta hasiendo fiansanan ku por transforma den akshonnan. Den e kaso aki e interes di e akshonistanan aktual ku no paga, ta baha. Gobièrnu hulandes tin aktualmente 9,34% di akshonnan. E porsentahe por baha na 8,66%. Un tersera parti di akshonistanan di Air France-KLM a bisa ku nan lo paga. Minister Kaag di Finansa a tuma desishon e aña aki ku lo kumpra 220 mion euro na akshonnan pa mantene e nivel di interes den KLM. E biaha aki e no a bai di akuerdo ku e petishon di e kompania pa mas plaka. Kaag a bisa ku invershon di èkstra plaka den e kompania for di punto di bista di interesnan públiko no ta nesesario ne momentunan aki. Estado hulandes ta keda un dje akshonistanan mas grandi di e kompania i e posishon di informashon i envolvimentu den tomo di desishon ta keda mantene. Den 2019 estado hulandes a kumpra akshonnan den Air France-KLM. Estado hulandes a paga 744 mion euro pa kumpra 14% di akshonnan. For di e dia ei e balor a baha konsiderablemente. E interes di estado tin balor aktualmente di 300 mion euro.