WILLEMSTAD – Djaweps 13 di yüni 2024, Gobièrnu di Kòrsou, den presensia di Promé Minister sr. Gilmar Pisas, Minister sr. Shalten Hato di Hustisia, sr. Minister Ornelio Martina den representashon di Desaroyo Sosial, Labor i Bienestar, Minister sr. Sithree van Heydoorn di Enseñansa, Siensia, Kultura i Deporte i Komandante di region di Karibe, sr. Walter Hansen a firma e akuerdo pa profeshonalisá “Sociaal Vormings Traject” Kòrsou (SVT).

E kombenio akí ta keda realisá den e kuadro di palabrashonnan entre Kòrsou i Hulanda, rondó di reformanan den e ‘Landspakket’. E reforma akí ta inkluí bou di e tema ‘H18′ i ta ser designá komo Programa di Formashon Sosial/’Sociaal Vormings Traject’. Ministerio di Hustisia, Ministerio di Desaroyo Sosial, Labor i Bienestar (SOAW), Ministerio di Edukashon, Siensia, Kultura i Deporte (OWCS) i Ministerio di Defensa, tur ta partner den e proyekto akí. Na aña 2021 a firma e promé kombenio pa tres aña. Despues di un evaluashon eksitoso, ta bolbe firma kombenio pa tres aña mas.

E akuerdo a keda firmá na Marinebasis Parera. E trayekto ‘Sociaal Vormings Traject’ mihó konosí komo Un Komienso Nobo, ta konsistí di un parti di formashon militar (kuater luna) i un parti di stazje (seis luna). E trayekto ta pa hóbennan ku un défisit sosial, ku hopi bia tin di aber ku problemanan sosial. Den e kurso e hóbennan ta siña normanan manera traha huntu, rèspèt, regularidat, responsabilidat i disiplina. Nan ta haña edukashon militar básiko i nan ta risibí un barèt i sertifikado na final di e parti di formashon. Despues e hóbennan ta sigui ku nan formashon i ta kore stazje seis luna largu pa por kompletá e trayekto. Di e forma akí nan lo ta prepará pa e próksimo paso den komunidat sivil.

Un desaroyo nobo den e SVT ta ku den e akuerdo nobo hende muhé tambe por sigui e kurso. Strukturalmente lo bai duna pa aña, dos kurso un pa hende hòmber i un hende muhé, ku un máksimo di 24 persona pa kada trayekto. Na ougùstùs 2024 un grupo di hende muhé ta bai kuminsá. Ainda tin espasio pa esnan interesá.