Rutmilda Larmonie: a presentá un plan pa kombatí probresa. Pero unu di e problemanan mas grandi di gobièrnu ta mal gastamentu di fondonan públiko.

Punda—Gobièrnu di Kòrsou atraves di añanan a keda sin evitá inefisiensia den su maneho finansiero pagando proyektonan kostoso i dunando fundashonnan inkapasitá miónes tur aña, miéntras a sigui paga ménos na ònderstant. Sifranan resien presentá pa Minister di Asuntunan Sosial (SOAW) Ruthmilda Larmonie, kompará ku atvertenshanan emití pa Kontrolaria General ta konfirmá e ponensha.

Segun presentashon di Larmonie, un kobrado di ònderstant ta kosta gobièrnu Nafl. 324,80 pa luna. Si bai tras di sifranan di Kontrolaria General, un kamara di vigilansha por ehempel riba kaya ta kosta te ainda Nafl. 104 mil florin pa instalá i manehá.  Segun Kontrolaria General, anualmente gobièrnu ta paga kasi 130 mion florin na fundashonnan, for di kual kasi 52 mion ta bai na fundashonnan sin ku gobièrnu ta na altura na unda nan a gasta e supsidio. Mas serio ainda, Kontrolaria General a atvertí gobièrnu ku den pasado tabatin pagonan ilegítimo ku a tuma lugá pafó di proseder na eks- ministernan.

E sifranan presentá pa minister Larmonie, siman pasa no solamente ta reflehá pobresa na Kòrsou, pero alabes ta reflehá tras di kortina kon gobièrnu aktual i esnan anterior a neglishá gastamentu di plaka, lagando atras e posibilidat di drecha pobresa. Segun Minister Larmonie Kòrsou ta pagando 6.556 kobradó di ònderstant. Un kalkulo indikativo ta yega na 2.2 mion florin mensual kual ta igualá alrededor di 27 mion florin anual. Segun Kontrolaria General, na 2022 Gobièrnu di Kòrsou a paga 52 mion florin na fundashonnan supsidiá ku no a duna kuenta i rason unda a gasta e supsidio, miéntras segun Kontrolaria General mayoria di e fundashonnan supsidiá nan kostonan ta bai na pago di personal. No tin bista tampoko kuantu salario i benifisionan sekundario personal di e fundashonnan en kestion ta risibi.

Kontrolaria General a urgí gobièrnu na diferente okashon durante 2022 pa kuminsá ehersé mihó kòntròl. No solamente riba e fundashonnan ku no ta dunando kuenta i rason, sino tambe na proyektonan mionario ku no ta evaluá despues. Por ehèmpel, e invershon di 104 mil florin pa un kámara di vigilansha. Ta trata di e kosto total ku gobièrnu a paga dividí esaki riba 212 kámara instalá. E instalashonnan i operashon inisial a kosta gobièrnu 22 mion florin. Na desèmber 2022, Kontrolaria Gerneral a mustra nan prekupashon riba e proyekto. Den un rapòrt, e instituto di kòntròl a bisa ku mirando e situashon ku a konstatá relashoná ku e proyekto Vigilansia Públiko ku Kámara, Kontrolaria General ta rekomendá Minister di Hustisia pa laga fase 3 tambe, esta evaluashon di e proyekto tuma lugá mas pronto posibel. Fase 3 ta enserá evaluashon di e proyekto.

Kontrolaria a duna Minister di Hustisia 8 rekomendashon den e rapòrt tokante e investigashon hasí di e proyekto Vigilansia Públiko ku Kámara. E konklushon di Kontrolaria ta ku e ehekushon no a tuma lugá na tempu ni di forma efektivo. Tampoko a regla un presupuesto di antemano. Pa kolmo a eksedé e presupuesto ku a pone disponibel pa e proyekto despues i por lo tantu no por kompletá e proyekto denter di e presupuesto reservá.

Tambe e mester traha un presupuesto realístiko di e kostonan tantu pa kaba e proyekto, komo pa e vigilansia ku kámara por ta sostenibel. Por ehèmpel, kosto struktural pa konekshon riba ret, i mantenshon i remplaso di ekipo na tempu. Den e ‘beleidsplan’ di fondo di kriminalidat yüli 2022 pa yanüari 2023, Ministerio di Hustisia a reservá 1 mion florin pa e proyekto. “E pregunta ta si esaki ta sufisiente, mirando loke mester realisá ainda.” Es desir, for di lokual a presupuestá, tabatin alkansamentu di e fondonan.