DEN HAAG—Un grupo grandi di muchanan hulandes no a haña e bakunashonnan kontra malesanan di infekshon.

Pa promé biaha den desenia e grado di bakunashon di e grupo di muchanan tabata bou di 90% den 2022, segun Instituto di Salubridat (RIVM). E instituto ta preokupá ku e desaroyo. Sekretario di estado Maarten van Ooijen (Salubridat) ta haña e desaroyo preokupante. Un grado haltu di bakunashon ta importante pa protekshon di e muchanan kontra malesanan severo i pa evita kontagionan di e malesa segun RIVM. Pa di dos aña konsekutivo tin un bahada. Manager Rijksvaccinatieprogramma (RVP) ta spera ku por para e desaroyo. Di otro manera ta bini diskrepansia entre esnan ta bakuna i esnan no-bakuna. RIVM ta kere ku e bahada ta relashoná ku e pandemia di corona i deskonfiansa ku hende a haña kontra e bakunanan of gobièrnu en general. Van Ooijen ta mustra tambe riba e desinformashon ku tabatin durante e añanan di corona. Hament ta haña importante ku hendenan papia tokante dudanan. Mester siña skucha otro mihó. Sekretario di estado tambe kier kompronde kon ta bai aserka esnan ku no kier bakuna. Den e instituto e muchanan ta haña prek kontra entre otro sarampi, difteria,tetano, polio. Pa un malesa hopi kontagioso manera sarampi un grado haltu di bakunashon ta di sumo importansia, segun RIVM. Den generashonnan anterior esaki tabata riba 90%. Ku esaki e protekshon tabata na nivel. Si pa años ta bakuna ménos, malesanan por bolbe lanta kabes. Ainda no ta asina leu segun Van Ooijen. Mester hasi tur posibel pa evita esaki. RIVM a kuminsa un programa di investigashon pa duna mas informashon riba bakunashon i kon hasie mas aksesibel. E sifranan ta mustra pa muchanan ku a nase den 2020 pa bakunashon e porsentahenan entre 87,3 i 90%. Awendia tin hende ta ninga pa laga registra e bakunashon.