WILLEMSTAD: Resientemente Banco di Caribe a uni su mes n’e selebrashon di Fundashon Birgen di Rosario i a klousurá e temporada di seú den bon ambiente. E Fundashon pa hende grandi ya tin 81 aña di eksistensia i kontinuamente ta hasi nan máksimo esfuerso p’e adultonan di terser edat sigui sinti nan mes inkluí den nos komunidat. 

Fundashon Birgen di Rosario huntu ku boluntarionan a subi kaya, wapa i gosa un ratu ku e grandinan di manera ku nan tambe por a disfrutá di e periodo kultural. Banco di Caribe ta komprondé e importansia di trabou boluntario i esaki tabata e kontribushon perfekto pa e okashon aki. Pues trahadónan di Banco di Caribe a djòin e marcha pa prinsipalmente pusha habitantenan ku ta den ròlstul, p’asina nan tambe partisipá. Durante e mainta por a tuma nota di e públiko, inkluyendo famianan i amigunan, ku a bin para kantu di kaminda pa apoyá i atmirá e empleado i habitantenan di Fundashon Birgen di Rosario. Algun miembronan di famia tambe a djòin e marcha pa kompañá nan ser kerí riba e ruta. Tur esakinan huntu a logra krea un ambiente festivo pa e hende grandinan.

E marcha di seú di Fundashon Birgen di Rosario tabata un proyekto grandi ku a konta ku partisipashon di e diferente kasnan di hende grandi ku ta forma parti di e fundashon. Kada kas i departamentu, a skohe nan tema i tabata enkargá pa krea e trahenan kultural i kolorido pa nan empleado i habinantenan. Esfuersonan di Fundashon Birgen di Rosario ta di apresiá. Banco di Caribe ta apoyá inisiativanan ku ta inkluí nos hende grandinan i ta mantené nan kontentu, aktivo i den moveshon.