Pago: Knob Trading tabata paga. CPR tabata un grupo fantasma sin sèn.

Isla—Caribbean Petroleum Refinery, for di Yüni 2023 te ku Aprel 2024, no tabata por a presentá ningun dokumento den Korte Sivil, pa mustra nan seriedat di tabata kandidato potensial pa bira preferred bidder den “eks” proyekto Arawak.

De fakto, a resultá den tratamentunan den korte ku Caribbean Petroleum Refinery no tabatin “niun depchi”. E konsorsio, a kousa mas daño ku bon. E konfliktonan ku CPR a kousa na Kòrsou, ta pone hasi e chèns bastante limitá ku “huma” lo bolbe sali for di pipanan di Isla. Aló ménos pa rafinashon di krudo. For di 2019, Kòrsou ta purbando na logra un sosio stratégiko pa e refineria nashonal, sin logro. E último eskoho, Caribbean Petroleum Refinery, tabata e desaster mas grandi for di 2019.

No mester di niun  investigashon forensiko mas pa determiná si e konsorsio di Caribbean Petroleum Refinery tabatin sèn. Durante tratamentu den korte riba 5 di yüni 2023, a keda konfirmá ku CRU no tabatin ni sèn pa paga e hür di 1.2 mion dòler na CRU. Defensa di abogadonan den e kaso di grupo Raul Socorro (CPR Holding) kontra di Erchenel Doran (CPR BV) a mustra ku tabata e  kompania Knob Trading pagando hür na CRU pa CPR por a keda ku e kontrakt. For di depósitonan di KNOB, tabata paga salario di e direktornan di CRU, entre nan Giusti 8 mil dòler, Doran 10 mil dòler i tambe Alejandro Marquez, kende entre 2 di febrüari pa 3 di Mart a risibi kasi 60 mil dòler, segun bukinan di CPR.

Refineria di Kòrsou, riba konsehonan di Herbert Mensche i Patrick Newton a konsehá Gobièrnu di Kòrsou un grupo ku no tabatin sèn pa manehá hinter e planta riba tereno di Isla. Nan tabata dependé  100% riba otro kompanianan pa finansiá nan “lobimentu” na Kòrsou.  Durante febrüari 2023 por ehèmpel, riba kuenta di Socap Corporation, e kompania Knob Trading a depositá kasi 2 mion dòler riba kuentanan di Socap Corporation pa na nòmber di CPR e pagonan bai CRU di Kòrsou Si e pagonan realmente  a bai ta un otro diskushon. Esakinan ta prueba ku CPR mes no tabatin ni sèn pa paga un hür di 1.2 mion florin mensual, CPR no tabatin sèn pa por a drai ni nan mes te pa drai Refineria Isla.

E konsorsio di CPR, a despista Refineria di Kòrsou i tambe despista gobièrnu di Kòrsou. Hues mr. van Leeuwen tambe a laga korte duna un opinion den e veredikto tokante e finansas di e grupo. Segun Korte, e partidonan a diskutí durante hinter e tratamentu riba kòntròl den e kompanianan CPR BV i CPR Holding. Pero korte a remarke na ningun momento ningun dje partidonan a papia riba finansas ni tampoko a menshoná nan situashon finansiero. Entretantu, Knob Trading ta buskando un sitashon sivil pa kuminsá demandá e sosionan venezolano den CPR, riba sèn ku nan a risibi sin ku e sèn a yega kuentanan di Refineria di Kòrsou. Knob Trading ta sospecha ku sosionan den CPR a baha bai ku miónes sin a manda nan sèn bek.

Kontrali na lokual Refineria di Kòrsou a presentá den parlamento di Kòrsou, CPR nunka tabatin sèn. Despues ku e kompania SOCAP a entrega nan oferta riba e destaho pa Refineria Isla na Mart 2022, riba 14 di Yüni, akshonistanan di Socap huntu ku Erchenel Doran a establesé CPR Holding (tene kuenta ku CPR BV ta e kompania trahadó i CPR Holding ta e kompania mama). Doran Global Investment di Erchenel Doran tabata e kompania ku a laga establesé e Holding. A nombra Doran Luis Giusti, Mario Chaar i Billy Steblina. Riba mesun fecha a establesé tambe CPR BV. Tur akshon di CPR BV tabata den CPR Holding. Komo direktornan di CPR BV a keda nombra, Doran, Alejandro Marquez i Raul Socorro. Despues ku problemanan di legitimashon a kuminsá i tratamentunan di parlamento a bira delikado, entre e gruponan di sosio i direktornan a krea un problema. Den korte a sali na kla ku CPR, ni Holding ni e BV, no tabatin sèn. Finalmente, tabata e yu di Kòrsou, Erchenel Doran a keda atras pa trata na plak drecha i lokual e sosionan venezolano a bai laga atras. Doran alabes a skapa tambe pa e fuel oil kontrabanda ku grupo CPR a laga drenta Kòrsou.