Willemstad,– Pa medio di e komunikado aki nos ke pone pueblo i sosionan di ACU na altura ku un grupo di sosionan uní a start un akshon pa kolekta sufisiente firma pa aserká Direktiva di ACU pa organisá un REUNIÓN GENERAL (ALV) ku karakter di urgensha.

Konforme artikulo 30 di Statutonan di ACU tur aña mester tene un reunión general, no mas lat ku luna di Mei. Den e reunión general aki ta trata e.o kuentanan annual, maneho finansiero di direktiva, Konseho di Supervishon i Komishon di Kredito, ta duna kuenta I rason tokante e maneho hibá durante e aña ku a pasa.

E reuniónan general di aña 2020 i 2021 a wòrdú postpone pa dos aña konsekutivo pa motibu di situashon di e Pandemia di COVID 19. Konsekuentemente e reuniónan general konforme artikulo 30A insisio 2 di Statuto di ACU den kual miembronan pa 3 organonan statutario, esta pa Direktiva, Konseho di Supervishon i pa Komishon di Kredito no por wòrdú skohí. I nos ta pone enfasis riba esaki, ku esta pa 2 aña kaba ELEKSHON no a tuma luga!!

No por bini ku ningun otro reunión general ekstra-ordinario intermedio pa atende ‘trabaonan pa yega na un Statuto nobo,’ ku no konose legalidat final, promé ku tene reuniónan general annual konforme eksigensianan para den e Statutonan di ACU. Tambe direktiva vigente tin e obligashon pa ley pa responsabilisá su mes dilanti ALV pa ku situashon finansiero di ACU pa asina e por logra “DE-CHARGE”, esta aprobashon di su maneho dor di ALV, tambe adhunto pa ku e intervenshon di “stille curatoren” di banko sentral den e asuntonan interno di nos koperativa.

Desde 8 di yüni 2020 òf pa kasi 2 aña kaba e “stille curatoren” a intervení den ACU, pero nunka nan no presentá un karta di Banko Sentral na ALV i na sosionan (ku ta doño di ACU) pa ku nan intervenshon den ACU.

Si no ta basta awor Direktor General señor E.M.L. Scoop a presentá un karta fecha 4 di aprèl via e sistema digital di ACU, kaminda e ta hala atenshon di sosionan di nan obligashon di ‘Partisipashon Ekonómiko’ komo sosio di ACU. Kada sosio tin e obligashon pa mensualmente depositá minimal di 25,– florin riba su kuenta di akshon. Esaki ta ankra den artikulo 11 inisiso 3 di nos Statuto, manera e karta di Direktor General mes ta bisa, konforme e Statuto aktual i ofishal di ACU.

Un alerta asina aki ta nifika ku tin inkomplimmiento pa ku pago mensual di deposito dor di sosionan, kual ta e fundeshi finansiero di ACU. Esaki no ta un nota positivo pa ku situashon finansiero di nos koperativa. 

Nunka antes un karta asina aki no wòrdú presentá na sosionan.  Nos ta hasi un yamada urgente na sosionan di ACU pa hasi uso di nan derchi I firma e petishon awor pa ku un REUNION GENERAL INMEDIATO!

Por subi e siguiente wepsait: www.acu-alv.com