Den oranan di ayera Guatemala a aktivá e alerta internashonal.

GUATEMALA – Outoridatnan di Guatemala a aktivá den oranan di ayera, un alerta internashonal pa asina lokalisá 10 komersiante ku a disparsé na e parti sur di Mexico, unda a registrá un subida di violensia relashoná ku krímen organisá den último simannan.

Outoridatnan guatemalteko a informá den un komunikado di prensa, ku nan ta kordinando ku outoridatnan mehikano pa asina haña e grupo di personanan ku a drenta na Chiapas pa realisá aktividatnan komersial i ku a keda reportá komo pèrdí for di dia 16 novèmber.

Segun e mesun fuente, e personanan registrá komo pèrdí ta originalmente di e departamento di Suchitepéquez, ubiká na sùitost di Guatemala i entre e grupo tin un menor di edat di 17 aña.

Te ainda, ta deskonosé e lugá presis unda e disparishon a keda registrá pero ta hasiendo un investigashon afondo di un ruta komersial ku e personanan aki a uza pa bende galiña i pa drenta vários munisipio na frontera, manera Chicomuselo, El Porvenir, Motozintla i Siltepe Diversos. Aki ta unda a señalá ku míles guatemalteko a krusa na e parti sùit di Mexico, for di aña 1990, a drenta pa bende kòfi, hasi trabou i hopi mas.

For di luna di sèptèmber, na Chiapas, a registrá un oumento di agreshonnan kontra sivil di parti gruponan relashoná ku narkotráfiko i abitantenan di e region a denunsiá un abandono di parti outoridatnan.

Segun e Registro Nashonal di Personanan Pèrdí i No Lokalisá di Mexico, 123 migrante a disparsé na e pais den e promé semèster di 2023. Esaki miéntras ku aña pasá, a registrá mas di 2.000 persona den tránsito pèrdí.