Antonio Guterres, kende ketu bai ta luchando i pidiendo yudansa pa Haiti.

PORT-AU-PRINCE – E sekretario general di ONU, Antonio Guterres, a atvertí den oranan di djaluna tras di lomba ku e situashon trágiko di Haiti ta un menasa pa seguridat den Karibe i otro regionnan. Esaki na mesun momentu ku el a preshoná e komunidat internashonal pa duna un kontesta.

Guterres a papia despues di reuní porta será ku e promé minister di Jamaica, Andrew Holness, den su promé bishita na e isla, kua a keda produsí tres luna despues ku Holness a anunsiá ku su gobièrnu lo tabata dispuesto na manda sòldá i agentenan polisial pa Haiti. Esaki komo parti si un propuesta di forsa armá internashonal.

Guterres a señalá ku ningun otro pais no a dal un stap dilanti apesar ku e promé minister di Haiti i otro funshonario nan haltu, a pidi na òktober tras di lomba pa manda yudansa internashonal di forma inmediato pa lucha kontra oumento di violensia den gèng nan.

Holness, kende a bishitá Haiti na febrüari tras di lomba komo parti di e impulso regional pa yuda media den e krísis di e pais, a indiká ku e paisnan ku ta apoyá aktonan di e tipo aki, mester wak promé den un konsenso polítiko na Haiti i tambe un kalendario pa pone fin na e yudansa.

E kapital di Haiti i alrededor di esaki a sukumbí den gran medida di gruponan armá, kua nan a invadí bario nan i a mata personanan den un lucha pa kontrolá mas i mas teritorio. ONU inkluso ta kalkulá ku awor gruponan armá tin kòntròl di 80% di Port-Au-Prince.

E violensia a empeorá despues di asesinato di e presidente Jovenel Moise na yüli di 2021.

Mas di 840 persona a keda asesiná den e tres promé lunanan di e aña aki, ademas ki mas di 600 a keda asesiná solamente den luna di aprel, segun ONU. Mas di 400 persona tambe a keda sekuestrá e aña aki.

E nesesidat humanitario ku tin na Haiti ta dramátiko. Tin un sistema polítiko paralisá i un nivel di violensia di parti gruponan armá ku ta inkreibel.

Anteriormente tabatin un inseguridat na Haiti ku a alkansá nivelnan komparabel ku paisnan den konflikto armá.

E mortonan a hiba na un subida di haitianonan fadá i frustrá òf inkluso a provoká un kantidat di persona tumando hustisia den nan propio man, asesinando 164 supuesto miembro di gruponan armá durante luna pasá.

Frantz Elbé, direktor di Polis Nashonal di Haiti, a afirmá den un video publiká den oranan di djasabra riba retnan sosial, ku agentenan ta luchando kontra gruponan armá, konfiskando arma i liberando rehen, pero no a fasilitá sifranan.

ONU a señalá ku poko mas di 13.000 agente ta den servisio aktivo na e pais di mas ku 11 mion di abitante, i ku un total di 21 agente polisial a keda asesiná den e tres promé lunanan di aña.