AMSTERDAM/WILLEMSTAD – Hulanda ta bai adaptá e Buki 2 di Kódigo Sivil di Notariado relashoná ku implementashon dje Richtlijn di Union Europeo (EU) di e Parlamento Europeo i di e Hunta di 20 di yüni 2019, pa kambia e Richtlijn EU 2017 relashoná ku e uso di instrumentonan i prosesonan digital den kuadro di ‘vennootschapsrecht’ (derecho di empresa).

Esaki lo hasi posibel pa abitantenan di Aruba, Kòrsou, Sint Maarten, Boneiru, Saba i Sint Eustatius lanta un besloten vennootschap (BV) online konforme lei Hulandes, basta nan tin nashonalidat Hulandes of di un estado ku ta miembro di Union Europeo. Franc Weerwind ku ta minister di Protekshon Legal (Rechtsbescherming) di Hulanda a kontestá esaki riba pregunta di miembronan di VVD den Tweede Kamer den un karta djaluna último. Ela splika ku konforme e Tratado di funshonamentu di Union Europeo (VWEU) den relashon ku e Anekso 2 dje tratado ei, Aruba, Kòrsou, Sint Maarten, Boneiru, Saba i Sint Eustatius ta asosiá ku Union Europeo. Nan ta e asina yamá LGO (landen en gebieden overzee). Den nos teritorionan no tin ‘Unierecht’ (lei di Union Europeo) òf ta apliká esaki di forma limitá.

A base di e di kuater parti dje VWEU i e desishon LGO ta apliká un kantidat limitá di reglanan riba e LGO, esta nos paisnan. Sinembargo esaki no ta kubri e Richtlijn, loke ta nifiká ku e proposishon di lei ku Tweede Kamer ta tratando no ta pèrmití pa lanta un BV online segun, por ehèmpel  e lei di Kòrsou. Ni e abitantenan di Kòrsou ni esnan di e parti Europeo di Hulanda por lanta un BV online konforme e lei di Kòrsou a base dje proposishon di lei aki.

Weerwind: “Sinembargo lo ta posibel pa abitantenan di Aruba, Kòrsou, Sint Maarten, Boneiru, Saba i Sint Eustatius lanta un BV online konforme lei Hulandes, basta nan tin nashonalidat Hulandes of di un estado ku ta miembro di EU.” Teniendo kuenta ku e proposishon di lei ta establesé ku e abitantenan dje parti oropeo di Hulanda por lanta un BV online, esaki ta aplikabel pa abitantenan di Aruba, Kòrsou, Sint Maarten, Boneiru, Saba i Sint Eustatius tambe ku tin nashonalidat Hulandes òf di un otro estado ku ta miembro di EU. “Ta rekerí un identifikashon elektróniko rekonosé pa Union Europeo pa por lanta e BV online. E eksigensia aki ta konta pa tur hende ku ke lanta un BV online, dus pa e abitantenan di Aruba, Kòrsou, Sint Maarten, Boneiru, Saba i Sint Eustatius tambe. Porlotantu e identifikashon di personanan ta meskos sigurá pa tantu e abitantenan di Hulanda komo esnan di Aruba, Kòrsou, Sint Maarten, Boneiru, Saba i Sint Eustatius. No tabatain niun konsulta ku Aruba, Kòrsou, Sint Maarten, Boneiru, Saba ni Sint Eustatius tokante e tema aki.” Asina Weerwind a splika finalmente riba pregunta di VVD.