Henry Caldera.

WILLEMSTAD—Deporte Vigilante tabata den kontakto ku tékniko di e ekipo di Inter/Willemstad tambe, kende ta Henry Caldera. Esaki despues ku a bira konosí djasabra den oranan di atardi, promé ku e desishon ku wega di su ekipo i Undeba lo no sigui, ku su persona no lo bai ta ku e ekipo di Inter/Willemstad djasabra anochi.

“Manera mi a bisa for di un prinsipio kaba, tur hende sa kiko ta pasando i debí ku tabatin alrededor di 10 luna sin futbòl, a opta pa hunga bala. Pero finalmente mester karga konsekuensia tambe si. No ta paso a hinka hopi energia i plaka, mag trapa derechi di Hubentut Fortuna.

 Si no por manehá segun regla mester bai kas, esei mi a bisa kaba den un entrevista ku bo. Ta 14 luna tin ku no kier tende pa e bèrdat i ta tormentá lokual ku inkluso mi gusta i ta den e último fase, ku ta futbòl.

Mester tin hustisia. A inisiá malu, apesar ku un i tur por a antisipá riba e desishon final, un i tur a djòin pa bala lora, pero awor tin tur kos pretu riba blanku i ofisial riba mesa. Tin desishon di hues ku mester duna arbitrahe i awor un desishon di Komishon Arbitrahe tambe, ku ta duna Hubentut Fortuna rason, ku mester kumpli kuné.

Awe por ta Fortuna, pero mañan por ta un otro ekipo tambe, miéntras ku e maneho ta asin’aki. No mester poné regla un banda pa sèn i tampoko sèn no mester dominá hustisia. Ni tampoko ku e pensamentu ku ta paso ta un grupo ménos privilegiá i/òf x ekipo, ta trapa su derechinan. (Esaki inkluso ta para den bijbel).

Tur kos ta bon kla awor i Jong Holland a dal e promé paso djasabra. Esei a hasi hinter e kos un bòmbòshi i ami no ta parti i bòmbòshi. Pues mi ta opiná simplemente, ku mester sigui regla i tin ku proponé fecha pa e final entre ‘Seru’ i Saliña i punto”, Henry Caldera a duna i konosé.