Abogado Blonk a splika kon su kliente a keda detené durante un entiero ku el a bishitá na fin di 2023.

Nieuwe Haven,– E hóben Dishane Nelson su kaso di apelashon ta den tratamentu kaminda pronto korte lo dikta nan veredikto. Ta asina ku e hóben ta den detenshon preventivo, pero e abogado ku ta hibando defensa pa e hóben a indiká ku e detenshon preventivo ta un inhustu.

Apesar ku korte a duna un veredikto intermediario indikando ku e detenshon preventivo tin sufisiente base legal, E abogado dje hóben ketubai no ta di akuerdo ku e desishon aki. Abogado mr Alicia Blonk for di fin di aña 2023 ta diskutiendo den sala di korte ku e detenshon preventivo di su kliente no ta un detenshon preventivo hustu. Den práktika outoridatnan sa sera un persona ku a kometé un echo penal pa asina evitá mas daño na komunidat òf pa eliminá chèns ku e akusado ta afektá e investigashon penal.

Den e kaso di Dishane Nelson, kende a asesiná su padrastro riba 8 di mei 2022 riba akusashon di maltrato dje mama a keda kondená na un kastigu di 10 aña inkondishonal. Den e tratamentu anterior, apesar dje veredikto di enkarselashon, korte a dikta tambe ku e hóben no mester bai será ainda komo ku su proseso penal ketubai ta kanando. Aunke ku e aresto preventivo di Nelson tabata di skòrs durante su veredikto, e hóben a keda detené durante un entiero den fin di aña 2023.

E defensa hibá pa abogado Blonk a splika ku na aprel 2023 su kliente a keda kondená na un kastigu di 10 aña. Apesar di e kastigu pisá, su kliente tabata den libertat i e hues kende a duna e veredikto a indiká spesífikamente ku e no ta enkarselá Nelson riba e fecha ku el a duna e kondena. Blonk a splika korte ku den tipo di kasonan aki, ora duna kondena kaminda e akusado no mester sinta mesora, ta imponé un rekomendashon di enkarselashon. Segun Blonk, nos leinan ta stipulá ku e rekomendashon nan aki ta bálido pa 5 luna i si akaso despues di 5 luna determiná ku e akusado mester bai será, esaki mester sosodé den un tratamentu pro-forma den sala di korte penal. I e abogado a splika ku no tabata tin ningun kaso pro-forma pa enkarselá su kliente.

Aktualmente Nelson ta será ketubai pa tende e veredikto den su kaso. Ta asina ku Ministerio Públiko a demandá un kastigu di 15 aña komo ku e ruta ku e hóben lo a kore pa yega na e sitio di delito ta indiká ku e hóben a bai buska e arma promé. Kual segun OM ta duna sufisiente indikashon ku ta trata di un asesinato premeditá.