Nieuwe Haven,– Den korte ayera a presentá e hóben J la C (24) kende ta keda akusá ku dia 26 di febrüari e aña aki a importá un kantidat di 1873 gram di XTC

Tabata dia 26 di febrüari ku e akusado a yega for di Jamaica i ku Duana a disidí di hasi un inspekshon riba su maleta. Durante di e kòntròl a bin konstatá ku tabatin algu no normal ku e maleta di e akusado. E maleta tabata hopi pisá i ora ku a bai kontrolá esaki a bin topa ku algun pakete kual a laga hasi tèst riba e kontenido i a bin resultá ku den e paketenan tabata droga i a pisa esakinan ku tabatin e peso di 1873 gram.

Dia 27 di febrüari a interogá e akusado kende a bisa e dia ei ku e no tabata sa ku tabatin droga den e maleta.

Den e siguiente interogashon el a disidí ku e ta koperá ku hustisia i a splika ku ta trata di un maleta ku el a kumpra na Jamaica un dia promé ku el a bini bèk Kòrsou.

Hues a splika e hóben aki den korte ayera ku ta hopi biaha e kasonan aki ta bini den korte i nunka e akusadonan no por bisa por ehèmpel na unda nan a kumpra e maleta. Mr Snitker ta splika e akusado ku bo no por kumpra un maleta nobo ku dos kilo di droga den dje i komo pasahero bo mester sa kiko tin den bo maleta, “Pues bo sa ku bo tabata transportando droga”, asina Hues a bisa e akusado ayera den korte.

E akusado J de la C a splika hues Snitker den korte bisando lo siguiente “Tin biaha hende ta usa nos, tin biaha nos ke papia e bèrdat, pero nos famia ta kore peliger. Tin biaha bo no ke papia pa seguridat di bo mes i bo famia”.

E akusado a splika hues ku den su situashon, e tabata serka su amiga na Jamaica kaminda el a keda durante kasi un luna i na momentu ku e mester a regresá Kòrsou su amiga a pidié si e por hasié un fabor pa entrega e maleta na su famianan aki na Kòrsou. E akusado a bisa hues ku el a tira un bista ariba ariba den e maleta pa wak si tur su kosnan tabata den e maleta i e no a ripara nada straño. Tambe e akusado a splika hues ku e mucha muhé lo a bisé ku e ta bai yud’é pa e bai Colombia pa tratamentu di su pia ku a keda malu despues di un aksidente i tur esakinan a pone ku el a pensa ku lo no ta un problema pa e hiba e maleta pa e famianan di su amiga mirando ku e famianan lo mester tabata bayendo di biahe.

Mas aleu e akusado a sigui splika den korte ayera ku e amiga di dje na Jamaica  a yud’é paketá su maleta i tabata esun ku tabata dobla e pañanan i e mes tabata hinka nan den e maleta, pues e no sa ta ki ora e mucha muhé lo por a hinka e droga den e maleta.

“Mi a keda di shòk na momentu ku nan a bin bisa mi ku a haña droga den mi maleta”, asina e akusado a bisa den korte ayera.

Hues Mr. Snitker a splika e akusado ku esun ku a pone e droga den e maleta, mester a tuma su tempu pa hasi esaki, mirando ku e pakinan tabata pega (plak) den e maleta. Hues a splika e akusado ku den pasado e tabatin problema kaba ku hustisia, tempu ku na 2019 el a manda droga pa un dama na Inglatera i ku tambe riba un otro fecha, el a mand’é pakete ku droga aden pa un persona na Hulanda,k pues e sa bon bon kon e kosnan ta hinka den otro i ku tin kastigunan pisá pa transportashon di droga. E akusado a bisa den korte ayera ku e dos kasonan ei el a hasi nan bou di influensha di droga i ku ta usa nan a us’é. E akusado a splika e fiskal Mr. K. Hara tambe ku si bo papia bèrdat den korte, bo famia ta kore peliger i ku e ta bisa esaki, paso hues ta kere ku ta ganja e ta ganja, pero ku e ta hura ku e ta papiando e bèrdat.

FISKAL

Finalmente fiskal Hara a skucha tur kos i ta haña ku e echonan ta legalmente i konvinsentemente proba ku e akusado a importá droga. Fiskal ta bisé ku e mester sa mihó, paso el a yega di pasa den e kosnan aki kaba, pues e mester sa.

Fiskal a hasi un demanda di 30 luna di prizon di kual 6 kondishonal ku un tempu di prueba di 3 aña.

HUES

Finalmente hues a bai di akuerdo ku e demanda di fiskal, pero solamente el a subi e kantidat di luna kondishonal i na lugá di seis ku fiskal a pidi, hues a dun’é 10 luna kondishonal i pues e mester sinta 20 luna kitando aresto preventivo i VI.